SYUDAD SANG ILOILO (PIA) -- Bangud sa dako nga potensyal sang Pilipinas sa produksyon sang electric vehicle (EV), gina-abi abi ni Presidente Ferdinand Marcos Jr. ang kooperasyon sang publiko kag pribado nga sektor agud mangin major player ang pungsod sa industriya sang EV.

Sa ginhiwat nga pagsapol kaupod ang Private Sector Advisory Council - Job Sector Groups (PSAC-JSG) sa Malacañang, ginhambal sang Presidente nga ang Pilipinas mangin kabahin na sang global chain sang EVs bangud sa potensyal sang industriya.

Apang, mangin dako naman nga paghangkat ang kinahanglanon sang mga konsumidor sa source power nagikan sa green energy sa bahin sang EV nga industriya sang pungsod.

Agud mahatagan solusyon ang ini nga mga panghangkat, gin-highlight sang president ang pribado kag publiko nga sektor nga tamdonon ang ini nga isyu. Nalakip man sini ang pagmando sa PSAC-JSG nga mag-sumiter sang kompleto nga lista sang mga proposal.

Nagsaad man ang PSAC-JSG nga pagatun-an ang proposal kag padayunon ang pag-obra kaupod ang ila nga mga consultant agud makahatag sang mas labing maayo nga plano sa presidente.

Nangin representante naman sa bahin sang pribado nga sektor kanday Sabin M. Aboitiz sang Aboitiz Equity Ventures Inc., Joey Concepcion III sang RFM Corp., Alfredo Ayala sang AC Education Inc., Rizalina Mantaring sang Ayala Corp., Kevin Tan sang Alliance Global Inc., Doris Magsaysay-Ho sang Magsaysay Group of Companies kag Teresita T. Sy-Coson sang SM Investments Corp.

Samtang, nangin PSAC-JSG resource person naman sang council si Anthony Oundijan sang  Boston Consulting Group.

Nagpakigkita ang advisory council sa presidente agud diskusyunan ang mga updates kag ang mga naglinigad nga mga rekomendasyon kag nagpresenta sang bag-o nga mga stratehiya agud mapasanyog ang trabaho sa pungsod ilabi na sa patag sang agrikultura, information technology kag business process management, manufacturing, maritime, kag automotive nga mga sektor.

Dako man ang pagsuporta sang PSAC-JSG sa administrasyon tuhoy sa paghatag prayoridad sa vehicle manufacturing nalakip man ang combustion engines kag EVs. Naghatag man man sila rekomendasyon sa paghiwat sang data-driven nga pagtuon para sa mga kahigayonan sa EV value chain.

Nalakip sa mga bag-o nga rekomendasyon sang council amo ang pagsuporta sa gobyerno sa EV manufacturing nga may proposal sa pag-usisa sang kahigayonan sa 17 downstream kag upstream industry, kaupod man ang mining sa EV value chain.

Ginapaabot man nga malampasan sang global EV sales ang non-EV sales sa tuig 2026, gani ini ang magapabag-o sa industriya.

Sa pihak nga bahin, pito sa 18 ka mga common nga parte sang salakyan ang ginahimo diri sa Pilipinas.

Dako man ang mga kahigayonan sa Pilipinas sa pagpasangkad sang copper mining kag refining, copper-heavy component manufacturing, expansion sang electrical component manufacturing, software development kag mga delivery centers.

Dugang pa, may yara sang regional advantage ang pungsod kapin pa sa raw materials, battery kag parts manufacturing bangud sa dunang manggad kaangay sang copper kag nickel, kag ang naangot man nga kahigayonan sa domestic processing kag production. (AAL/LMLE/PIA Iloilo/PND)