BAYOMBONG, Nueva Vizcaya (PIA) - - Ti Citrus Festival nga mapas-pasamak laeng sadiay Malabing Valley iti ili ti Kasibu ket maysan nga tinawen nga Town Fiesta.

Sigun kenni Christian Daulayan, Municipal Tourism Officer, napagnunumwan dagiti ofisyales ti local government unit ken dagiti mannalon ti citrus ti panagbalinen nga tinawen nga Town Fiesta ti Citrus Festival.

“Gapu iti daytoy nga adoption ti Citrus Festival a kas Town Fiesta ti Kasibu, lalo nga mangted  daytoy ti oportunidad tapno maipakaamopay ti naduma-duma nga lugar ti kalidad ken kinaimas ti citrus products dagiti mannalon ditoy nga ili,” kinuna ni Daulayan.

Kinunapay ni Daulayan nga ti Citrus Farming ket maysan nga pangawis ti Kasibu kadagiti naduma-duma nga turista tapno maipakita daytoy kas parte ti kultura ken eco-agri tourism attraction ti Kasibu.

Iti kallabes nga lawas, napasamak manen ti Citrus Festival ngem saanen nga naangay sadiay barangay Malabing nu di ket sadiay barangay Poblacion ti Kasibu.

Sigun kadagiti officiales ti Kasibu, mailiw dagiti umili ti panagrambak ti Citrus Festival gapu ta maysan daytoy nga parte ti kultura ti Ifugao tribe, panagyaman ti ili gapu ti agtultuloy nga progreso ti Kasibu ken dagiti mannalon ken panangipakita kadagiti naduma-duma nga lugar ti kalidad ken kinaimas dagiti citrus products ti ili.

Ti industria ti citrus ket suportado dagiti nasyonal ken local nga ahensia ti gobyerno tapno agbalin daytoy nga kas kalidad dagiti citrus nga imported. (BME/PIA Nueva Vizcaya)