TAGBILARAN CITY, Bohol, Sept. 5 (PIA) -- Gidayeg ni Bise Presidente ug Kalihim sa Department of Education (DepEd) Sara Duterte ang mga sakripisyo ug kakugi sa mga magtutudlo sa paghatag og edukasyon sa mga kabataang Pilipino.

Gipangunahan ni Duterte ang kick-off program sa National Teachers' Month (NTM) ug World Teachers' Day (WTD) adlaw’ng Martes, Setyembre 5 sa Bohol Wisdom School Gymnasium sa syudad sa Tagbilaran.

“Many dreams started inside the classrooms. Many dreams were inspired by teachers (Daghang mga damgo nagsugod sulod sa mga lawak-klasehanan. Daghang mga damgo ang nadasig sa mga magtutudlo),” matod pa ni Duterte.

Isip pag-ila sa dakong papel sa mga magtutudlo sa pag-edukar sa kabataan, ang Kalihim sa Edukasyon nagkanayon nga nagplano siya nga pauswagon ang kahanas sa mga magtutudlo ug pagaanon ang ilang mga buluhatong administratibo diin gikan sa 56 ngadto sa 11 na lamang ka mga buluhatong administratibo ang ihatag.

Gawas niini, mahimo usab nga maka-avail ang mga magtutudlo sa 30 ka adlaw nga diretso nga bakasyon ug ablihan ang usa  ka website sa DepEd aron maghatag og legal nga tabang sa mga magtutudlo.

Gawas kang Duterte, nitambong usab sa maong kalihukan si Senador Imee Marcos ug mga mahinungdanong opisyal sa DepEd, schools division offices gikan sa rehiyon 6, 7 ug 8, mga education partners, mga local nga opisyal nga gipangulohan ni Gov. Erico Aristotle Aumentado ug Tagbilaran City Mayor Jane Yap.

Nipasalig si Sen. Marcos nga mohatag og P1,000 ug usa ka sakong bugas sa matag magtutudlo nga nitambong sa maong kalihokan.

Sa wala pa ang kick-off program sa NTM, miduyog usab si Duterte sa tree-planting activity sa Taloto Elementary School.

Matud pa niini nga ang pagpananom og mga kahoy magsilbi nga pahinumdom sa kontribusyon sa mga magtutudlo sa kinabuhi sa matag tinun-an ug sa kalamboan sa nasud. (ECB/PIA7 Bohol)