SYUDAD SANG ILOILO (PIA) -- Ginpangunahan sang Presidential Communications Office (PCO) kaupod ang Philippine Information Agency (PIA) kag Office of the Presidential Adviser on Peace, Reconciliation and Unity (OPAPRU) ang paglagda sang Memorandum of Agreement agud mapasanyog ang hilikuton sang gobyerno nga naangot sa kalinong kag katawhay sang pungsod.

Sa isa ka MOA signing ceremony, ginpahayag ni PCO Secretary Cheloy Velicaria-Garafil ang importansya sang epektibo nga komonikasyon bilang panugod sang pagbag-o, ilabi na sa mga duog nga apektado sang gamo kag inaway.  

“Beyond mere information dissemination, we aim to craft messages that resonate with diverse communities, building bridges of trust and understanding … We are dedicated to countering misinformation and crafting narratives that inspire, educate, and uplift,” suno kay Secretary Garafil.

Nalakip man sa mga nagtambong sa kahiwatan amo kanday OPAPRU Secretary Carlito Galvez Jr. kag PIA Director General Jose Torres Jr.

Sa idalom sang MOA, ang PCO nga nagapanguna sa National Task Force to End Local Communist Armed Conflict (NTF-ELCAC) Strategic Communications Cluster, magadihon kag patigayon sang komprehensibo nga stratehiya sang communication plan kaupod ang OPAPRU kag PIA.

Naangot man sa ini nga responsibilidad ang paghimo sang IEC materials kag pagtukod sang online presence sang Local Peace Engagements (LPE) kag Transformation Program (TP) sang OPAPRU gamit ang digital assets sang PCO kag mga kaupod sini nga ahensya.

Sa pihak nga bahin, ang PIA nga napaidalom sa PCO, magaserbe nga information network sang gobyerno sa paglab-ot sa grassroots level kaupod ang pagpanguna sa media orientation workshop sa mga pili nga rehiyon sang pungsod kag pagdihon sang mga survey reports.

Samtang, ang OPAPRU magahimo kag patigayon man sang komprehensibo nga stratehiya sang communication plan agud mapatuman  ang LPE kag TP sa bulig sang PCO kag sang PIA kun sa diin ini ang magahiwat man sang workshop tuhoy sa prinsipyo kag instrumento sang Conflict Sensitive and Peace Promoting (CSPP) Communities, kag iban pa. (AAL/LMLE/PIA Iloilo/PND)