SAN JOSE, Antique (PIA) -- Ang Department of Trade and Industry (DTI) nagapatuman kang Automatic Price Control (APC) para sa mga nagapanguna nga baraklon sa dya nga banwa kang Antique tungod sa pagdeklarar kang state of calamity tuga kang African Swine Fever (ASF).
Ang dyang deklarasyon nasandig sa resolusyon kang Sangguniang Bayan kang San Jose de Buenavista nga No. 223, 2023 nga serye.
Angot kadya, ang DTI nagapatuman ka APC sa sulod kang 60 ka adlaw suno sa probisyon kang RA 7582 ukon Price Act of the Philippines.
Si Trade and Industry Development Specialist Arnel Oliveros kang DTI-Antique naghambal nga ang mga nagapanguna nga kinhanglanon sa idalom kang jurisdiction ka DTI nga ginalakipan kang mga de lata nga sardinas, gatas, kape, habon panglaba, kandila, asin, tinapay, tubig, kag noodles.
Ang pagpatuman kang APC nagabase sa gintagna nga presyo kang mga produkto nga ginmonitor antis pa magdeklarar kang state of calamity.
Gindugang hambal ni Oliveros nga adlaw-adlaw ang pagmonitor kang DTI para masigurado ang pagsunod sa APC kang mga manugbaligya para man sa proteksyon kang mga manugbakal.
Ang opisina kang Provincial Veterinarian nagreport kang masobra P14 ka milyon nga kapiyerdihan sa industry kang baboyan sa San Jose kag masobra P57 ka milyon sa bilog nga probinsya.
Hamtic ang pinakauna nga banwa sa Antique nga naapektohan kang ASF katong bulan ka Mayo nga may masobra P42 ka milyon nga kahalitan. (AGP/PSM/PIA Antique/Gerald Nallana/GIP)
