SYUDAD SANG ILOILO (PIA6) -- Ginlatag sang Commission on Elections (COMELEC)-Iloilo, kaupod ang iban pa nga ahensya sang gobyerno, ang ila mga preparasyon kasubong na ang estado sang seguridad sang mga barangay para sa paalabuton nga Barangay kag Sangguniang Kabataan Election (BSKE) sa Oktubre 30, 2023.

Sa press conference nga ginhiwat sang Setyembre 6, 2023, ginpahayag ni Provincial Election Supervisor kag concurrent City Election Officer Atty. Reinier Layson nga magapadulong ang COMELEC-Iloilo upod ang Philippine National Police (PNP) sa kada distrito sa syudad kag probinsya sang Iloilo umpisa Setyembre 11 tubtob 18 para tan-awon ang estado sang komunidad kag mabal-an kung may ara makabig nga “intense political rivalries”. Ang assessment ang maging basihan para sa listahan sang “areas of concerns” ukon “election hotspot” sa Iloilo.

Setyembre 16 tubtob 22, 2023.

Nagpang-andam man ang COMELEC-Iloilo kontra sa “pre-mature campaigning” kag “vote buying; kag ginpangabay ang mga kandidato nga maging tampad sa tion sang kampanya.

Samtang nagpangabay man si Iloilo City Police Office Director P/Col. Joeresty Coronica sa publiko nga indi pagsakdagon ang mga kandidato nga durugista sa syudad sang Iloilo.

Dugang pa sang opisyal nga kon magsuporta ang mga pumuluyo sa mga durugista nga kandidato indi mangin epektibo ang Barangay Anti-Drug Abuse Council kag basi magbalik ang problema sang syudad sa iligal nga droga.

Sa pihak nga bahin, ginpahayag naman ni Layson nga wala sang dapat problemahan sa posible nga pagbakante sang mga posisyon bangud sa disqualification ukon cancellation sang COCs bangud damo ang nagpapili para sa BSKE 2023.

“I don’t think that’s a concern for the DILG  to conduct a special election for purposes of filling up vacancies sa SK tungod sa wala kita nakakompleto sang na-elect natun nga sa SK elections. For this coming election that will not be [a matter of concern],” dugang pa ni Layson.

Basi sa datos sang COMELEC Iloilo, may ara 58,552 ka mga indibidwal ang mapadalagan para sa BSKE sa probinsya kung sa diin 3, 896 ang mapadalagan sa pagka-kapitan; 30,040 para sa pagka-barangay kagawad, kag 24, 616 sa SK.

May ara naman 6,760 ka aspirants ang mapadalagan sa Iloilo City nga ginabug-usan sang 396 ka mga nagapapili sa pagka-kapitan, 3,599 naman sa pagka-kagawad, kag 2,765 para sa SK. (AAL/JNH/PIA6 Iloilo)