Dugang pa ni Ellazar, base sa datos kang KWF, ang Pilipinas sangka pungsod nga bugana sa mga lenggwahe nga may kapin 135 na ka mga lenggwahe, pati ron ang Filipino Sign Language (FSL).

Ginapakita man kang kaduruhon kang mga lenggwahe nga ang Pilipinas may manami nga “linguistic ecosystem” nga nagapamaan kang kadarag-an kang mga grupo etniko sa pagpreserbar kang andang lenggwahe kag kultura.

Bangod nga duro ang mga lenggwahe sa Pilipinas, importante man ang pagtuon kang Filipino nga amo ang pangnasyonal nga lenggwahe kang Pilipinas agod masiguro ang epektibo nga komunikasyon kag pag-intindihanay sa paglambot kang kauswagan.

Samtang, sa sangka programa sa radyo, ginhambal ni Education Program Specialist II kag Division Information Officer-designate Eric Cortejo kang Department of Education (DepEd) Schools Division Office (SDO) Antique nga importante ang padayon nga pagtuon kang Filipino kag iban pa nga lenggwahe kay dya nagapabaskog kang kultura.

Dugang pa ni Cortejo, kaimaw kang KWF ang DepEd sa pagprotekta, pagpreserba, kag pagpaugwad kang nagakalain-lain nga lenggwahe sa pungsod paagi sa bulig teknikal nga ginatugro sa mga manunudlo.