LUNGSOD NG SAN FERNANDO, La Union (PIA) – Nagsagawa ng outreach program ang National Police Commission (NAPOLCOM) Region 1, kasama ang Police Regional Office 1 (PRO 1), La Union Police Provincial Office, Rotary Club Metro San Fernando, at Department of Social Welfare and Development (DSWD) Region 1 sa Barangay Amontoc, San Gabriel, La Union nitong ika-anim ng Setyembre.
 
Ang aktibidad ay bahagi ng selebrasyon ng ika-29 na National Crime Prevention Week na naglalayong maiparating ang iba’t ibang serbisyo ng pamahalaan at mga katuwang nito sa mga nangangailangang residente sa bayan ng La Union. 

Ayon kay Atty. Leilani Vecina, assistant regional director ng NAPOLCOM Region 1,  ang outreach program ay isang paraan para maipadama ng ahensya ang kanilang presensya, tulong, at malasakit sa mamamayan sa simpleng pamamaraan
 
“Alam ko naman po na hindi ganoon kadali ‘yong sitwasyon nila. The same way sa atin parang isang araw lang naman ‘yong ginagawa natin na ganito, which is annually done naman pero sa kanila it’s more of every day. I hope na itong simple na mai-e-extend natin na tulong sa kanila kahit papaano, makadagdag ito sa saya na mararamdaman nila,” ani Vecina
 
Siniguro rin nito sa mga benepisyaryo na ipagpapatuloy ang suporta sa gobyerno upang maiwasan at matuldukan ang mga problema dulot ng iligal na droga, kriminalidad, terorismo, insurhensiya at lalong lalo na ang karapatang pantao.

Bahagi ng outreach program ang pagsasagawa ng gift-giving activity, medical and dental mission, at feeding program para sa 15 na bata sa naturang barangay.
 
Namigay din ng food packs ang DSWD at Rotary Club Metro San Fernando sa humigit kumulang na 30 pamilya.
 
Sa pagpapatuloy ng kanilang programang Oplan Balik Eskwela, nagbigay din ng saya ang PRO1 sa mga bata sa pamamagitan ng pagbibigay ng mga laruan, tsinelas, at mga gamit pang-eskwela. 
 
Bukod dito ay ang pagbibigay ng libreng gupit para sa mga benepisyaryo.
 
Nagkaroon din ng lektyur tungkol sa Anti-Red Tape Law at Anti-Violence Against Women and Children. 

Sa kanyang mensahe, nagpasalamat si San Gabriel Municipal Mayor Lany Carbonell sa serbisyo at presensya ng mga ahensya ng gobyerno para sa mamamayan ng nasabing bayan.
 
"Nag-uumapaw po ang aking puso sa saya dahil sa kabila ng mahaba-habang oras na biyahe ay narito po kayo ngayon, naghahatid ng saya rito sa aming minamahal na San Gabriel. Nawa'y hindi po kayo magsawa sa pagtulong sa nangangailangan," ani Carbonell.
 
Samantala, taos puso ang pasasalamat ni Lolinet Bang-utan, isa sa mga benepisyaryo, sa natanggap niyang  biyaya. 
 
“Sobrang saya po namin kasi masyadong malaking tulong na po ito sa amin pati po sa pamilya namin,” ani Bang-utan.
 

Patuloy naman ang NAPOLCOM sa paghahatid ng de-kalidad na serbisyo lalong lalo na sa geographically isolated and disadvantage areas upang mas mapalakas pa ang ugnayan at matulungan ang mamamayan na lubos na nangangailangan. (JCR/AMB/KJCR, PIA La Union)