TAGBILARAN CITY, Bohol, Aug. 22 (PIA) -- Gimandu ni Gobernador Erico Aristotle Aumentado ang labing dali nga pagbawi sa mga linsok sa mais nga gipang-apud-apod nga diay genetically modified organism (GMO), taliwa sa aktibo pa nga ordinansa sa Bohol nga nagdili sa GMO. 

Pinaagi sa Executive Order No. 30, series of 2023, gipabawi ni Gob Aumentado sa mga ahensya, mga establisemento ug nga indibidwal nga nagpa-apud-apod niini ngadto sa mga mag-uuma sa Bohol.

Gawas sa pagpabawi niini gikan sa mga mag-uuma, sukip sa mandu ang pagdaut niini aron dili na magamit aron mapatunhay ang kalikopan sa Bohol ug pagpabilin nga maayo ang local biosystem ug  ang kalikopan alang sa mga kaliwatan.

Kahinumduman nga napagawas sa Bohol ang Provincial Ordinance No 2003-10, nga walay si bisan kinsa nga magpasulod, maghimo og laboratory o filed testing o bisan unsa nga kalihukan aron pagpugas ug pagpagitib sa bisan unsa nga GMO; tanum man o hayop o micro-organism sa bisan diin nga dapit sulod sa teritoryo sa Bohol.

Mismo usa  ka opisyal sa Department of Agriculture ang mi-angkon nga nagpahimo na ang nasudnong kagamhanan dinhi sa Bohol sa pagpatanum sa GMO nga mais, nga gisuportahan usab sa  mga ahensya sa agrikultura, bisan pa sa ordinansa batok niini.

Ang GMO nga mais, gipatanum sa ubang lugar, aron gamiton sa paghimo og pagkaon sa mga hayupan ug dili sa tawo, apan daghan ang nagtuo nga ang nasanggi nga GMO corn, gikaon na usab sa mga tawo.

Ang kemikal nga anaa sa GMO, ilabi na kadtongmakapatay sa mga dangan nga motubo kuyog sa mais, namatikdan nga maka-ingon sa sakit nga kanser, ug delikado nga makapapu-o sa mga insects ug mga langgam nga makatukob sa mga insects nga nahilo sa kemikal.

Ang Section 4 sa executive Order sa Gobernador nagbutyag nga ang makalapas sa ordinansa batok sa GMO, masilotan og P5,000 ka pesos, o pagkabilanggo o kining du  haka silot madungan, segun sa kabubot-on sa korte.

Gani, kadtong mga establisemento ug kompanya nga magpakatag niini, mahimong trangkahan.

Lakip na usab sa orden ehekutibo ni Aumentado ang pagpabuhi og balik sa Inter Agency GMP Monitoring Committee, bisan pa nga gipanawagan na sa gobernador ang dinalian nga pagpahunong sa pagpang-apud-apod niini ug pagbawi aron mahipos ug dili na kini makadaut pa sa kalikopan ug katawhan sa Bohol. (RAHC/PIA-7 Bohol)