ILIGAN CITY (PIA)--Singkwenta ka panimalay sa Purok 10, Phase 3, Barangay Dalipuga ning dakbayan ang gikatakdang makabenepisyo energization sa mga linya sa kuryente sa Iligan Light and Power, Inc. (ILPI).

Nagmalampuson ang ILPI sa energization sa mga panimalay hangtod sa mga barangay hall sa tanang 44 ka barangay sulod sa dakbayan. Sa karon, naningkamot ang ILPI nga maapil sa energization ang mga panimalay sa mga hilit nga lugar.

"Kining activity karon nga gihimo o program, mao ang continuation sa pag-energize sa 44 barangays down to sitio, purok hantod na sa mga household. Si Iligan light nagtinguha gyud nga makahatag og suga sa tanang residente dinhi sa Iligan," sumala ni Jeffre Opema, operations unit manager and spokesperson of ILPI sa ceremonial switch-on ceremony.

Usa ra si Trinidad Maraño  sa 17 ka mga panimalay gikan sa 50 ka mga target nga bag-o lang nakakuha og kuryente. Sa 11 ka tuig nga pagpuyo niya sa maong dapit, iyang gipahayag ang iyang kalipay sa elektripikasyon sa ilang komunidad.

"Pasalamat jud mi'g dako sa Iligan Light nga naa nako'y kuryente, sa mga opisyales, sa among kapitan ug purok president," sumala niya.

Samtang, nipadayag si Nilda Hamoy, barangay chairperson sa Dalipuga, sa iyang pasalamat sa ILPI sa kaayohan sa komunidad.

Nagpahigayon sab ang ILPI ug oryentasyon kung unsaon pag-apply alang sa koneksyon sa kuryente sa mga panimalay. Aduna sab pagpahibalo mahitungod sa mga regulasyon sa kaluwasan aron mapanalipdan ang mga residente ug mapugngan ang mga ilegal nga kalihokan sama sa dili awtorisado nga koneksyon sa kuryente. Gipahibalo usab ang mga residente bahin sa mga sangputanan sa paglapas sa kini nga mga balaod. (LELA/PIA-10/Lanao del Norte)