CEBU CITY, Cebu, September 14 (PIA) -- Mipanaog na og mando ang Regional Tripartite Wages and Productivity Board 7 (RTWPB-7) niadtong Septiyembre 5 kini kabahin sa pagpatuman ug P33 nga usbaw alang sa tanang minimum wage earners sa mga pribadong mga establisyemento sa Central Visayas.

Ang pag-usbaw magdala sa minimum nga suholan sa mga non-agriculture establishments ngadto sa P420-P468, ug P415-P458 sa agricultural ug non-agriculture establishments nga wala pay napulo ka mga trabahante depende sa geographical classification.

Mahitungod niini, ang bag-ong minimum wage rate mosaka na ngadto sa P468 gikan alang sa mga non-agriculture establishments ubos sa Class A classification nga naglangkog sa mga syudad sa Carcar, Cebu, Danao, Lapulapu, Mandaue, Naga, Talisay, ug mga lungsod sa Compostela, Consolacion, Cordova, Liloan, Minglanilla, San Fernando o ang Expanded Metro Cebu, samtang mosaka na usab ngadto sa Php 458 ang minimum wage alang sa mga agrciultural ug non-agriculture establishments dinhi nga adunay menos 10 ka mga trabahante.

Alang sa Class B nga naglangkob sa mga syudad sa Bais, Bayawan, Canlaon, Dumaguete, Guihulngan, ug Tanjay sa Negros Oriental, Tagbilaran sa Bohol, ug Bogo og Toledo sa Cebu anaa sa P430 ang bag-ong minimum wage alang sa mga non-agriculture establishments ug P425 sa mga agriculture ug non-agriculture establishments nga adunay menos 10 ka mga trabahante.

Ug alang usab sa Class C nga naglangkob sa mga syudad ug munisipalidad nga wala maapil sa Class A og B, anaa sa P420 ang bag-ong minimum wage alang sa mga non-agriculture establishments ug P415 alang sa mga agriculture ug non-agriculture establishments nga adunay menos sa 10 ka mga trabahante.

Anaa sa 346,946 ka mga minimum wage earners sa rehiyon ang direktang makabenepisyo sa bag-ong gipatuman nga pag-usbaw sa suholan samtang anaa usab sa 399,572 ka mga trabahante ang mahimo usab nga dili direkta nga makabenepisyo gikan sa pagtul-id sa mga wage distortions.

Sama sa gihatag ubos sa Omnibus Rules on Minimum Wage Determination, ang mga retail/service nga establisyemento nga nag-empleyo og dili molapas sa 10 ka mga trabahante ug mga establiysemento nga apektado sa natural nga mga kalamidad mahimong mag-aplay alang sa exemption sa maong usbaw sa sweldo.

Samtang ang mga establisyemento nga narehistro isip Barangay Micro Business Enterprises (BMBE) dili sakop sa minimum wage law subay sa Republic Act 9178.

Human sa direktiba sa pag-usbaw sa sweldo, ang RTWPB-7 mopahigayon ug mga information campaign sa rehiyon aron masiguro ang pagsunod sa maong wage order, ug maghatag ug tabang ngadto sa mga negosyo sa pagtul-id sa mga distorsyon sa sweldo.

Ang mga aplikasyon sa wage exemption ug mga katin-awan sa wage order mahimong ipadala sa RTWPB-7 pinaagi sa rb7@produktiboatsahod.onmicrosoft.com. (RGC/PIA7 Cebu with reports from DOLE-7 and RTWPB-7)