SYUDAD SANG ROXAS, Capiz (PIA) -- Nagbaton sang P15,000.00 ang tagsa ka 29 ka mga lisensyado nga magamay nga negosyante sang bugas sa probinsya nagikan sa Department of Social Welfare and Development (DSWD) sa ginpatigayon nga “payout” sang bulig pinansyal sang nasyonal nga gobyerno para sa mga kwalipikado nga mga benepisyaryo sadtong Setyembre 14 sa Paseo Del Rio diri sa syudad sang Roxas.

“Nagapasalamat gid kami sa nasyonal nga gobyerno kag Presidente Ferdinand R. Marcos, Jr. sa amon nabaton nga ayuda agud nga makabulig sa amon negosyo nga naapektohan sang implementasyon sang Executive Order No. 39 nga nagpanubo sa presyo sang regular milled rice sa P41.00 tagsa ka kilo kag well-milled rice nga P45.00 ang tagsa ka kilo,” pahayag ni Edilberto Cambe nga presidente sang Roxas City Cereal Association nga naka-base sa Teodoro Arcenas Trade Center (TATC) diri sa syudad.

“Bisan pa nga kuhaon ang price ceiling, ang presyo sang bugas ang maganubo sa ti-on sang tig-alani kag may posibilidad pa nga mas manubo sa P41.00 kag P45.00 kon may bastante nga lokal nga supply sang bugas sa merkado," dugang pa niya. 

Nahibaluan base sa monitoring sang Office of the Provincial Agriculturist, nga ang tig-alani ang nagsugod na sang nahauna nga semana sang Setyembre apang ang epekto sini sa presyo sang bugas ang mabatyagan sa ikatatlo ukon sa ikaapat na nga semana sang karon nga bulan. (AGP/AAL/PIA Capiz)