SYUDAD SANG ROXAS, Capiz (PIA) -- Padayon nga nagapanghatag ang lokal nga pangulohan sang Roxas City sang 15 ka kilos nga bugas bilang bulig sini sa tagsa ka kwalipikado nga pamilya diri sa syudad.

Ang rice subsidy ukon mas kilala bilang “Bugas para sa Taga Roxas” ang isa sa mga programa kaangot sa seguridad sa pagkaon sang Roxas City nga gin-umpisahan sa ti-on sang pandemya kag nagapadayon tubtob subong nga panahon sang "new normal."

Ginpahayag sang sangka benepisyaryo halin sa Brgy. Banica sining syudad ang iya pagpasalamat sa city government ilabi na gid subong nga nagatinaas na ang presyo sang mga balaklon sa merkado.

“Fifty-eight pesos na ang kilo sang bugas dira sa tyangge, tambak na amon utang. Hay wala ka mahimo kay kabos man ang kwarta. Daku-dako gid ang pasalamat ko kay naga-abot gyapon ang 15 kilos nga bugas ni mayor- libre na, maayo pa nga klase,” dugang pa sini.

Mahibal-an nga nagpagwa si Pres. Ferdinand Marcos Jr., sang Executive Order No. 39 nga nagamandu sang "price cap" sa bugas para mapahagan-hagan ang pagtaas sang presyo sini dala sang hoarding kag price manipulation diri sa pungsod.

Kaangot diri, nahauna man nga nagpakita sang ila suporta kag pagpasa-an ang Roxas City Cereals Association (RCCA) sang Teodoro Arcenas Trade Center nga magasunod ini sa mandato nga price ceiling sa regular-milled rice kag well-milled rice. (AGP/PLF/PIA Capiz)