TAGBILARAN CITY, Bohol, September 12 (PIA) -- Ang Police Regional Office (PRO) 7 mipresentar sa mga awards ug certificates ngadto sa mga personahe niini nga nakahimo og mahinungdanong accomplishment nga gipahigayon atol sa tradisyonal nga Monday Flag Raising ceremony niadtong Setyembre 11, 2023.

Gipangunahan kini mismo ni Regional Director, PBGEN Anthony A. Aberin uban sa mga sakop sa Command Group.

Sa kampanya batok sa ilegal nga drugas, usa ka PNP Medal of Merit (Medalya ng Kagalingan) ang gihatag nila PMAJ Andie Corpus, PSSg Chito Jerome Galua, ug PCpl Heracleo Padillo sa Panglao Police Station, Bohol Police Provincial Office.

Susamang award usab ang gihatag ni PMAJ Albert Jay Samson ug Pat Abraham Baring sa Lapu-lapu City Police Office.

Samtang usa ka Medalya ng Kasanayan (PNP Efficiency Medal) ang gi-award usab kang PSSg Richard Quinlaje sa Panglao Bohol tungod sa iyang dalaygon nga kontribusyon isip Investigator-on-Case, partikular na sa malampusong pagpasaka og mga kaso sa Paglapas sa Comprehensive Dangerous Drugs Act of 2002, batok sa usa ka big-time peddler sa lungsod sa Panglao.

Susamang pasidungog usab ang gihatag kang PSSg Mary Joy Lamboson sa Regional Learning and Doctrine Development Division tungod sa iyang paggradwar isip Over-all Top 1, sa bag-o lang natapos nga Public Safety Junior Leadership Course Batch 2022-01.

Samtang usa ka PNP Commendation Medal (Medalya ng Papuri) ang gihatag nila ni PLTCOL Epream Paguyod ug PSSg John Olen Gentiles sa 2nd PMFC, Cebu Police Provincial Office, alang sa pagdakop sa usa ka suspek pinaagi sa kusog sa warrant for the crime of Rape in Republic Act 8353 in relation to Republic Act 7610 niadtong Mayo 19, 2023 sa Brgy. Sinsin, dakbayan sa Sugbo.

Sa iyang mensahe, si PBGen Aberin mipadayag sa iyang pasalamat sa maayong performance sa tanan niyang personnel nga nisangpot sa talagsaong kalampusan sa PRO7.

Gisubli usab niya ang iyang pagduso sa pagbalik sa sukaranan samtang nagtuman sa gimando nga katungdanan sa pagkapolis. (ECB/PIA7 Bohol)