TAGBILARAN CITY, Bohol, September 19 (PIA) -- Usa sa mga armadong tawo nga sakop sa mga teroristang New People’s Army (NPA) nga napatay niadtong Septembre 7 didto sa Bilar, usa ka lider sa mga lumad nga maoy tig-organisa sa mga rally didto sa Mindanao ug sa Manila, ug ika tulo nga nominee sa partylist nga Sulong Katribu.
Gani, si Kerlan Fanagel, kinsa migamit usab sa ngalan nga Rogelio Jorillo subay sa identification card, ika tulo unta nga nominee sa Sulong Katribu, usa ka progresibo nga indigenous peoples partylist nga nagtumong sa pagpadala og representante nga mobarug ug manalipod sa mga katungod sa mga sakop sa mga indigenous communities.
Kini maoy gibutyag ni Jumorillo Guaynon, nga giila usab nga Datu Jumong, usa usab ka lider sa mga indigenous peoples (IPs) sa Bukidnon, kinsa mi-angkon nga kauban sila sa Makabayan Bloc nga ang tuyo mao ang pagpadaghan sa mga komunista sa Kongreso aron mas sayun na ang pagpakigbatok sa kagamhanan gamit ra usab ang iyang katigayunan.
Si Datu Jumong usa sa mga namulong atol sa Peace and Security Presscon nga giorganisa sa 3ID sa Philippine Army ug giabagan sa Kapitolyo sa Bohol.
Dayag ni Datu Jumong, si Fanagel mao usab ang tsirman sa Pasakaday Salugpongan Kalimudan (PASAKA/SMR) o Confederation of Lumad Organization in the Southern Mindanao Region, usa sa tulo ka mga tribu nga sakop sa PASAKA, ug sakop sa nasudnong kahugpungan sa IPs nga KATRIBU, KALUMARAN Mindanao ug SANDUGO, usa ka alyansa sa mga kahugpungan nga Moro ug IP.
Sa gipaambit ni Datu Jumong, kanhi nasudnong opisyal sa mga NPAs, una nga naila-ila niya si Faragel sa ilang mga tigum isip lig-on nga haligi sa walhong kalihukan.
Mitambong usab sa Press Conference on Peace and Security si Goberadnor Erico Aristotle Aumentado September 19, didto sa Capitol Cereminial Hall.
Giila ni Visayas Command sa Armed Forces of the Philippines (AFP) Commander Lt. Col Benedict Arevalo ang namatay nga si Kerlan Fanagel, kinsa usa usab ka ka gipangita nga sakop sa Regional Urban Committee sa mga NPA sa rehiyon sa habagatang Mindanao, segun pa sa mga taho.
Nailhan nga taga Poblacion, Malapatan Sarangani Province, si Fanagel, nga usa ka B’laan, aktibo sa adbokasya sa magpakayab sa katungod sa mga lumad, ug didto sa Talaingod, Davao del Norte, ila matud pa, nga gisudlan ang mga tunghaan sa mga Ata-Manobo og mga leksyon aron ang kabataan mosukol na sa kagamhanan.
Kini hinuon, takuban lamang, matud ni Datui Jumong, kinsa midugang pagbutyag nga ang mga kauban nila, mao ang mga kahugpungan nga sakop sa Makabayan Bloc.
Sa pasangil ni Joel Unad, segun sa mga taho, gitudlo didto sa mga kabataan sa eskwelahan sa mga Ata-Manobo ang pagsupak sa mga naa sa katungdanan ug mga tinugyanan, ang pagsamok sa mga kampo ug mga detachments sa kasundalohan, ang pagbungkag sa armas ug ang gitudlo nga alpabeto kabahin sa Armas ug Bala.
Si Unad, nga midala sa Mindanao Indigenous Peoples’ Council of Elders, minglada sa sumbong kauban sa mga elders sa tribu, ug mihangyo sa kagamhanan sa pagpasira sa mga tunghaan nga giharian sa mga rebelde.
Sa pagsira sa mga tunghaan, ang mga ginsakpan ni Fanagel, minghakot sa mga bata nga Ata-Manobo paingon ngadto sa usa ka pasilidad sa lain og tinuohan didto sa Davao, sa sama sa Haran Educational Facility, butang nga gikahingawa sa mga ginikanan sa mga bata.
Si Fanagel kauban nila ni Satur Ocampo ug ACT Party list representative France Castro nga gipasakaan og sumbong nga kidnapping, illegal detention ug paglapas sa katungod sa mga kabataan diha nga ilang gidala ang mga anak sa mga lumad nga Ata-Manobo sa Talaingod.
Sa iyang pagkatapnas sa Bohol, mingtuo si Brig. General Joey Escanillas, Brigade Commander sa 302nd BDE, 3rd Infantry Battalion nga gituyuan gyud og padala sa mga NPA dinhi sa mga kuyaw nga tigpasiugda, kay sayud sila nga dili na madala ang Boholano sa sulsol sa mga mabaw rag alamag sa kalihukang underground.
Apan, nasuta usab sa mga tinugyanan ang us aka linya nga permi nga gigamit sa mga rebelde nga komunista ang mga lumad, aron aghaton nga masilag sa kagamhanan, aron ila na usab nga kapaninapi-an. (RAHC/PIA-7 Bohol)
