May mga tourism personnel nga naka-estasyon sa information center halin Lunes asta Biyernes, 08:00 sa aga tubtob 05:00 sa hapon, para magbulig sa mga bisita nga mangita kang darayunan, lokal nga karan-an, tourist sites, kag mga aktibidad nga pwede buhaton.

Pagabutangan man kang internet connection kag lounge ang information center para mangin komportable ang mga biyahero kag turista samtang nagabisita sa Tourist Information Center, hambal ni Provincial Tourism Officer JC Cadiao Perlas.

Sa pagbukas kang Tourism Month 2023 nga ginahiwat kada-bulan kang Setyembre, ginhambal ni Perlas nga padayon ang Provincial Tourism and Cultural Affairs Office sa pagduso kang “sustainable tourism,” kapin pa nga bugana sa dunang manggad ang Antique.

Dugang na pa, tuyo ipalab-ot kang Tourism Month 2023 sa publiko ang pag-ulikid sa mga dunang manggad kag ang pagpahagan-hagan kang epekto kang mga aktibidad kang katawhan sa palibot.

Importante man kuon kang opisyal ang papel kang mga tumanduk sa pagbulig bantay kang palibot kontra mga aktibidad sa turismo nga may dara nga kahalitan sa dunang manggad.

Sa anang parte, nagapati si Governor Rhodora J. Cadiao nga mangin primera nga tourist destination ang Antique, samtang ana ginsiguro ang pagprotekta kag pagkonserba kang palibot kag mga dunang manggad kang probinsya. (AGP/BPS/GN/PIA Antique)