BAYOMBONG, Nueva Vizcaya (PIA) - -  Naikkan ti P15,000.00 tunggal maysa dagiti 88 nga Micro Rice Retailers (MRRs) ti probinsia idi kalman kas tulong ti gobyerno nasyonal gapu ti maipatpatungpal nga Mandatory Rice Price Ceiling (MRPC) iti intero nga pagilyan.

Dagiti MRRs ket manipud  ili  ti Aritao, Bagabag, Bambang, Diadi, Bayombong, Dupax del Norte, Dupax del Sur, Solano ken Villaverde.

Inawat dagiti MRRs ti nasao nga Economic Relief Subsidy manipud Department of Social Welfare and Development (DSWD) ken Department of Trade and Industry (DTI).

Segun kenni Marietta Salviejo, DTI Provincial Director, dagiti 88 nga MRRs ket immuna nga grupo ti rice retailers sector nga immawat ti nasao nga tulong gapu ta isuda ket simmurut a dagus ti nasao nga MRPC.

Ti MRPC ket linaon ti Executive Order  No. 39 ni  Presidente Ferdinand Marcos,Jr. tapno ipatungpal ti presyo ti Regular Well Milled Rice nga P41.00 per kilo ken Well Milled Rice nga P45.00 per kilo.

“Daytoy nga tulong ket para kadakayo nga MRRs nga nagtungpal a dagus iti EO 39 ni Presidente Marcos. Tulong daytoy ti national government gapu ta adun ti lugiyo gapu ito daytoy nga MRPC,” kinuna ni Salviejo.

Inallukoy pay ni Salviejo dagiti dadduma nga MRRs ti Nueva Vizcaya tapno agtulnog ti nasao nga Executive Order nga addaan pannusa kadagiti aglabsing wenno saan nga sumurot.

Segun met kenni Margie De Guzman, Presidente ti Grains Retailers Confederation of the Philippines (GRCP) – Cagayan Valley Chapter, dakkel a tulong kadakwada ti ayuda nga inted ti DTI ken DSWD.

Segun kenkuana, P130.00 agingga P150.00 ti lugida kada 25 kioos a sako ti bagas manipud idi nagtungpalda iti nasao nga EO 39.

“Agyaman kami idi daytoy nga tulong kadakami. Sinanama kami nga addantupay ti maited nga tulong gaputa agtultuloy met latta daytoy nga MRPC agraman dagiti saanpay nga natulungan nga kakadwami,” kinuna ni De Guzman. (MDCT/BME/PIA Nueva Vizcaya)