ALLACAPAN, Cagayan (PIA) – Mas natitiyak na ang kaligtasan ng mga residente ng Barangay Bessang sa bayan ng Allacapan sa lalawigang ito matapos pasinayaan kahapon, ika-27 ng Setyembre, ng lokal na pamahalaan ang bagong evacuation center na nagkakahalaga ng limang milyong piso.

Matatandaan na sa pananalasa ng bagyong Maymay nitong Oktubre 2022 ay isa ang Barangay Bessang sa mga nakapagtala ng pag-baha sa ilang kabahayan.

Sa naging mensahe ni Punong Barangay Francis Tesalona, pinasalamatan nito ang lokal na pamahalaan sa pagkonsidera na bigyang prayoridad ang pagpapatayo ng nasabing evacuation center sa kanilang barangay.

“Pagyamanan ken ni Mayor tayo apu ken ni Vice Mayor kadaguiti nakaad adu nga ipapaay da iti barangay tayo” ani Tesalona.

[Maraming salamat po Mayor at Vice Mayor sa mga napakaraming tulong na ibinibigay niyo sa aming barangay.]

Sa panig naman ni Mayor Harry D. Florida, sinabi nito na ma-swerte ang nasabing barangay dahil inaprubahan ng Department of Budget and Management ang kanilang panukala sa pagtatayo ng nasbaing evacuation center.

“Daytoy a evacuation center, taripatuen yo, alagaan yo, dalusan yo kanayun tapnu agbayag”, bahagi ng mensahe ni Mayor Florida.

[Alagaan, i-maintain at linisan niyo itong evacuation center para magtagal na magamit.]

Samantala, mas magiging maayos at mas komportable na ang pagsasagawa ng iba’t ibang aktibidad ang Barangay Capanickian Norte matapos naman pormal na i-turn over ng lokal na pamahalaan ang bago nilang multi-pupose gymnasium.

Ayon sa alkalde, nais nila na lahat sana ng mga barangay ay mayroong multi-purpose gymnasium na maaari nilang gamitin sa iba’t-ibang okasyon.

Gayunman, sinabi nito na ang iba pang mga barangay sa ngayon ay hindi pa nagkakaroon ng sariling multi-purpose gymnasium dahil wala pang nahahanap ang LGU na lote na maaaring pagpatayuan.

Ayon naman kay Vice Mayor Yvonne Kathrina S. Florida, nararapat lamang na maibalik sa taumbayan ang pera ng mga ito sa pamamagitan ng pagpapatupad ng iba’t ibang proyekto gaya na lamang ng pagpapatayo ng multi-purpose gymnasium.

Ang nasabing multi-purpose gymnasium ay nagkakahalaga ng limang milyong piso at may lawak na 5.182 metro at haba na 30 metro na kasing lawak ng isang basketball court, ayon kay Engr. Ronald J Cabalang, ang municipal engineer. (OTB/MDCT/PIA Cagayan)