TAGBILARAN CITY, Bohol, September 27 (PIA) -- Wala nay kapasidad pa ang mga rebelde nga maoy manguna og opensiba sama sa ilang gihimo kaniadto.
Kini maoy gipasalig ni Bohol Provincial Police Office Deputy Director for Operations Police Lt. Col. Norman Nuez, atul sa gihimo nga Bohol Peace and Security Press Conference, niadtong Septembre 19, didto sa Capitol Ceremonial Hall.
Ang pasalig ni Nuez, giambitan usab ni Army Colonel Leeroy Daanton, ang Deputy Brigade Commander sa 302nd Brigade, sa 3rd Infantry Division sa Philippine Army, kinsa maoy mitambong sa Presscon sa katungod ni Brigadier General Joey Escanillas, mismong Battallion Commander nga nakabase sa Tanjay City, sa Negros Oriental.
Ang Bohol, nahisakop sa territorial responsibility sa 3ID ug sa 302nd IB, ug gani, gimintinar sa Task Group Bohol ang iyang peace and security operations.
Kahinumduman nga niadtong Febrero 10, 2010, gideklara na ang Bohol nga insurgency free, ug mismo ang kalihim sa Department of National Defense Norberto Gonzales ang miduaw sa Bohol aron makatambong sa makasaysayanong higayon.
Niadtong mga katapusan nga tuig sa 1980, ang Bohol gihari-an sa mga rebelde ug giyano-yano lamang niini ang pagsulong sa mga estasyonan sa mga kapolisan, gihulga ang mga kampo sa mga military, bukas nga maghimo og pagbanhig ug nagdaghan usab ang pagpanghadlok sa mga negosyante nga dili mosuporta sa kalihukan nga walhon, matud ni Nuez.
Ang tineroristang buhat sa mga komunista nga rebelde hinuon, wala motunhay diha nga gipatuman sa Bohol ang programa kontra sa insurhensya nga nagtutok sa pagbuntog sa kawad-on pinaagi sa pagpasugod og mga kapanginabuhi-an, ug ang paggahum sa mga komunidad nga mangunay sa pahatag solusyon sa ilang mga suliran sa tabang sa kagamhanan.
Hangtud niadtong Enero 2019, matud pa ni Nuez, 31 ka mga rebelde ang nadakpan, 2 niini ang anaa sa Periodic Status Reports (PSR) sa kapolisan nga katumbas sa military order of battle ug 29 ang wala sa listahan.
Sa susamang taho ni Nuez, iyang gibutyag nga 28 na usab ka mga kanhi rebelde nga ming surrender ug mingbalik sa sabakan sa balaod.
Sa laing bahin, 13 na ang namatay sa mga pagsukliay sa bala tali sa mga rebelde ug tropa sa kagamhanan ug kapolisan, ug sa mga nangamatay, 3 niini ang anaa sa PSR sa kapolisan, samtang 10 niini ang wala sa listahan apan naghupot og mga armas.
Sa pagkakaron, matud ni Nuez, human sa pagkamatay sa unom ka mga sakop sa rebelde nga kalihukan, unom na lang ka rebelde nga anaa sa PSR sa kapolisan ang ilang gigukod.
“Unom na lang ka rebelde ang anaa sa PSR ang nagpabiling nagtagotago ug dili na makdali-dali og pakita s amga katawhan kay segurado nga isumbong dayun sila,” dason ni Nuez.
Ug inay sila ang kanhi manghasi, ang kapolisan na ug kasundalohan ang agresibo nga nangita sa mga rebelde sa tabang sa komunidad ug kini mapamatud-an sa lima ka labing bag-o nga encounter.
Matud ni Romeo Teruel, coordinator sa Ending Local Communist Armed Conflict (ELCAC), sa lima ka encounters, tanan ang mga tropa sa kagamhanan ang minghimo sa opensiba sama niadtong nahitabo sa sa Baunos, San Isidro niadtong Dec. 28, 2022, sa Hanopol Balilihan niadtong Marso 9, 2023, sa Tabuan Antequera niadtong Mayo 12, 2023, sa Dagohoy Bilar niadtong Hulyo 10, 2023 ug niadtong Septembre 7, 2023 nga gikamatay ni Kerlan Fanagel, sa usa indigenous peoples rights defender kunohay apan may taas nga ranggo sa mga rebelde sa tibuok nasud.
Niining tanan nga encounters, pulos kini nahitabo sa sumbong sa komunidad ngadto sa mga kasundalohan, sa presensya sa mga armadong tawo. (RAHC/PIA-7 Bohol)
