LUNGSOD NG VIGAN, Ilocos Sur (PIA) — Nagpaalala sa banta ng sakit na leptospirosis ang Provincial Department of Health Office (PDOHO) dito sa probinsya sa kabila ng tumataas na bilang ng mga kaso.

Ipinagbigay alam ni Development Management Officer John Lee Gacusan ng PDOHO ang paalala sa panayam sa programang Ammuentayo noong Sabado, ika-26 ng Agosto.

Base sa huling ulat noong ika-12 ng Agosto na nakuha ng PDOHO mula sa kanilang pagbabantay sa bilang ng mga kaso sa iba’t ibang mga ospital at Rural Health Unit sa Ilocos Sur ay may naitalang 52 na kaso ng “suspected and probable cases”.

"Kung makikita po natin sa data, iyon pong mga heavily flooded areas during the Super Typhoon Egay ang may pinakamataas na cases kagaya ng Vigan City na may naitalang 27 cases, at kung saan merong pong dalawang deaths," ani Gacusan.

Kasunod ng lungsod ay ang bayan ng Caoayan, isa rin sa mga bahagyang binaha noong bagyong Egay, na may 17 na kaso at isang naiulat na namatay dahil sa nasabing sakit.Samantala, sa kabuuan ay mayroon nang naitala na pitong pagkamatay kaugnay ng Leptospirosis.

May tig-dalawang kaso sa mga bayan ng Bantay at Santa Cruz, at tig-isa sa mga bayan ng Cabugao, Gregorio Del Pilar, Santa Catalina, at Tagudin.

Paalala rin ni Gacusan na paghiwa-hiwalayin ang mga basura dahil aniya, ito ang kadalasang pinupuntahan ng mga hayop, at kapag na-impeksyon o nahawaan sila, maaaring ito ang magkalat ng sakit na Leptospirosis.

Payo ni Gacusan, kung may masamang pakiramdam gaya ng lagnat ay mainam na agad magpakonsulta sa pinakamalapit na pagamutan. (JCR/MJTAB/ATV, PIA Ilocos Sur)