SYUDAD SANG ILOILO (PIA6) -- Nakapatigayon ang Iloilo City Police Office (ICPO) sang 264 tanan ka positive anti-illegal drugs operations sa syudad humalin Enero 27 tubtob Setyembre 26, 2023.

Ini ang ginpakigbahin ni ICPO director Police Colonel Joeresty P. Coronica sa pagsinapol sang Iloilo City Peace and Order Council (ICPOC) kag Iloilo City Anti-Drug Abuse Council (ICADAC) sang Setyembre 27, 2023, kung sa diin iya man ginsiling nga nahimo sang ICPO nga “effectively reduced the supply of drugs on the streets.”

Ginpahayag naman ni Coronica nga padayon ang paghiwat sang ICPO sang operasyon para masiguro ang kalinong kag seguridad sang publiko.

Dugang pa niya nga ang implementasyon sang patrol deployment plans sa pila ka lugar ang nakabulig sa pagpanubo sang crime incidents sa syudad.

Magluwas sa ila anti-narcotics operations, naka-aresto man ang ICPO sang 103 ka wanted persons sa syudad humalin Abril tubtob Hunyo 2023, mas mataas sang 25.61 percent kung ikumpara sa 82 lang ka persona nga ila naaresto sang 2022.

Gindayaw man ni Iloilo City Mayor Jerry P. Treñas ang ICPO kag ginpasiguro ini sang iya suporta para matapna ang tanan nga ilegal nga aktibidades sa syudad.

Nagpasar man sang resolusyon ang council kung sa diin ila gina-commend ang ICPO tungod sa ila manami nga performance. (AAL/JNH/PIA 6 Iloilo)