LEGAZPI CITY, ALBAY (PIA) -- Hinikayat ng Overseas Workers Welfare Administration (OWWA) Region 5 ang nasa 568 na Bicolano OFWs sa Israel na makipag-ugnayan sa embahada ng Pilipinas upang alamin ang contingency plan sakaling lumala pa ang kaguluhan.

Ayon kay OWWA Bicol Officer II Bernard John Bonnet, kasama sa contingency plan ang impormasyon kung saan at kailan maaring magtipon ang mga OFWs, gayundin ang rutang dadaanan palabas ng bansa.

“I strongly advise na alamin nyo po kung ano ang contingency plan. Pwedeng magtanong sa embassy. Alamin natin kung saan ang rendezvous point, where do we meet up. Saan yung ruta palabas ng bansa. Ang worst case scenario is, pag inatake na ang airport, wala nang means para makalabas ng bansa ng mabilisan,” pahayag ni Bonnet sa Ugnayan sa PIA Albay radio program nitong Oktobre 13, 2023. 

Sa bilang na 568 OFWs, 117 ay mula sa Albay, 150 - Camarines Norte, at 178 - Camarines Sur. Nasa 30 naman ang mula sa Catanduanes, 28 sa Masbate, at 64 sa Sorsogon. Karamihan sa kanila ay mga kababaihang caregivers.

Aniya, bagama’t desisyon pa rin ng OFWs kung uuwi o mananatili, kanyang payo na umuwi na lamang kung malalagay sa panganib ang kanilang buhay, lalo na kung ang pamahalaan ay magpatupad na ng mandatory repatriation o agarang pagpapauwi.

“Kapagka may pakiramdam tayo na we are in danger, unahin natin yung safety. Mas importante pa din ang buhay. Kunn magrerequest ng repatriation, makipag-ugnayan sa Philippine embassy,” ani Bonnet.

“If ever mag-escalate ang kaguluhan at magdeclare ng alert level 4, huwag na pong makipagmatigasan ng ulo. Magsignify na agad na kayo ay uuwi na. Kasi as long as may Pilipino na naandun, may mga personel na ilalagay ang buhay nila para ikaw ay ma-pull out,” dagdag niya.

Ang mga naiwang pamilya ay maari ding makipag-ugnayan sa kanilang opisina upang mabigyan ng agarang tulong ang kanilang mga mahal sa buhay. Ang kanilang regional office hotline ay 09499495133 at 1438 para sa central hotline.

“Para sa mga Bicolano na may kamag-anak o mahal sa buhay sa Israel, pag nakausap po ninyo, i-advise po ninyo na huwag na munang lalabas-labas kung hindi naman kailangan. Huwag masyadong pakakampante,” payo ni Bonnet.

Dagdag niya, nakahanda ang Balik Pinas, Balik Hanapbuhay program ng OWWA na magbibigay ng P5,000 – P20,000 livelihood grant sa mga uuwing OFWs.

"Nagbibigay tayo ng P20,000 pag active ang OWWA membership, P10,000 pagka expired pero may multiple contribution, at P5,000 kapag expired pero may kahit isang hulog. Binibigyan din natin sila ng livelihood assistance depende sa estado ng kanilang membership," pahayag niya.

Nakahanda rin ang P20,000 financial assistance relief. (PIA5/Albay)