TAGBILARAN CITY, Bohol, October 16 (PIA) -- Ang Philippine Institute of Volcanology and Seismology (PHIVOLCS) nagpahigayon og duha  ka adlaw nga public exhibit sa paghandum sa magnitude 7.2 nga linog nga mitay-og sa Bohol niadtong tuig 2013.

Gipahigayon sa activity center sa Island City Mall sa syudad sa Tagbilaran, nanghatag ang PHIVOLCS og mga information materials kalabot sa magnitude 7.2 nga linog nga miigo niadtong Oktubre 15 usa ka dekada na ang milabay, mga geological hazards, Bohol Island UNESCO Global Geopark, ug disaster response nga mga kahimanan.

Ang ubang mga bahin sa exhibit naglakip sa usa ka simulator sa linog diin ang mga bisita makasulod ug makasinati sa nagkalain-laing kakusog sa linog, ug ang tsunami simulator tank.

Ang exhibit pormal nga gibuksan niadtong Oktubre 13, sa pagpanguna ni PHIVOLCS director Dr. Teresito Bacolcol, Tagbilaran Mayor Jane Yap, Provincial Government of  Bohol supervising administrative officer John Maraguinot, Department of Education-Bohol (DepEd- Bohol) Division Superintendent Dr. Evangel M. Luminarias; DepEd- Tagbilaran City Division Superintendent Wifreda Bonggalos; Provincial Disaster Risk Reduction Management Office head Dr. Anthony Damalerio, ug City Disaster Risk Reduction Management Office head Gerard Lavadia.

Sa iyang mensahe, gihinumdoman ni Mayor Yap ang mga panghitabo sa magnitude 7.2 nga linog nga nisangpot sa pagkalas sa 208 ka kinabuhi, nga giingong kini nga panghitabo maoy usa ka testamento sa kalig-on sa mga Boholano.

Gipasiugda usab ni Yap ang kamahinungdanon sa panghitabo isip  pahinumdom alang sa lokal ug nasyonal nga gobyerno sa paghimo og lig-on nga mga pagtubag sa kalamidad.

Samtang si Maraguinot, kinsa nirepresentar kang Gobernador Erico Aristotle  Aumentado, namulong bahin sa kalihokan nga nagsilbi nga dakong katuyoan sa pagpahinumdom sa mga Boholano sa kamahinungdanon sa pagkaandam ug pagkamabinantayon sa panahon sa mga katalagman nga mga panghitabo, nagpasiugda sa pagkaandam sa komunidad aron maminusan ang mga epekto sa mga peligro.

Sa usa ka forum bahin sa mga linog, gisubli sa PHIVOLCS ang mga epekto sa M 7.2 nga linog ug ang mga leksyon nga makuha sa lokal ug nasyonal nga gobyerno gikan niini.

Si PHIVOLCS senior science research specialist Kathleen Papiona ug ang supervising science research specialist nga si Jeffrey Perez mao ang mga mamumulong atol sa forum.

Ang PHIVOLCS niingon nga importanteng mangandam sa mga kapeligrohan sa linog, sama sa Bohol nga usa  ka isla nga adunay upat ka faults nga mahimong hinungdan sa natural nga mga peligro.

Kini mao ang Northern Bohol Fault (hinungdan sa 2013 M 7.2 nga linog), ang Maribojoc Fault, Eastern Bohol Fault, ug Northern Mindanao Sea Fault o South offshore fault sa Bohol.

Ang magnitude 7.2 nga linog niadtong 2013, gidokumento isip unang inland reverse fault nga linog sa Pilipinas diin vertical ang paglihok sa yuta imbes nga pinahigda o horizontal.

Ang nasudnong ahensya nakigtambayayong sa kagamhanang probinsiyal, pinaagi sa Provincial Information and Media Office ug ang Provincial Disaster Risk Reduction Management Office, ang kagamhanan sa dakbayan sa Tagbilaran, pinaagi sa City Disaster Risk Reduction Management Office; ang Bohol Island UNESCO Global Geopark ug ang Alturas Group of Companies sa pagpahigayon niini nga exhibit. (ECB/PIA7-Bohol)