ILIGAN CITY (PIA)--Mokabat sa 2,000 ka political aspirants ug supporters ang miduyog sa usa ka unity walk ug ang mupirma sa peace covenant aron ipasiugda ang malinawon nga Barangay ug Sangguniang Kabataan Elections (BSKE) nga gikatakda karong bulana.

Miapil sab sa kalihokan ang mga opisyal ug empleyado sa Commission on Elections (Comelec), Iligan City Police Office (ICPO), 2nd Mechanized “Magbalantay” Brigade sa Philippine Army, Philippine Coast Guard, Department of Education, Department of the Interior and Local Government, ang Parish Pastoral Council for Responsible Voting, ug Philippine Information Agency.

Aron mapakita ang panaghiusa miduyog sab ang mga kandidato sa interfaith prayer nga gipangulohan sa nagkalain-laing relihiyosong grupo.

Gipasalig ni Iligan City Police Office City Director of Police Colonel Reinante Delos Santos ang publiko nga ginasiguro nila ang malinawon nga eleksyon.

“Sa Iligan, ang atong total number of personnel nga ideploy sa precinct naa sa 480.  Sakto ra jud ang security forces nga i-deploy sa election plus naa pay force multiplier nga very willing muserve. Wala tay problema pag abot sa security contingent nato,” matod niya. 

Samtang, gitambagan ni Comelec Iligan City Election Officer Lawyer Anna Liza Barredo ang mga botante nga mahibaw-an ang detalye sa ilang polling precinct aron dili malangan sa pagbotar.

“As of now, medyo linaw-linaw pa kay layo pa ang election, isecure na nila ang precinct number, sequence number, and clustered precinct kung aha sila nabelong so that pag-abot sa time sa election, dili na sila mangawala, straight na sila maudto sa polling place,” sumala niya.

Sumala ni Magbalantay Brigade Commander Colonel Anthon Abrina tumong sa unity walk nga ipromotar ang hapsay, matinud-anon, ug malinawon nga eleksyon.

Magpahigayon ang Comelec og training alang sa mga electoral boards nga responsable sa clustered precincts sa mga polling centers. (LELA/PIA-10/Lanao del Norte)