SYUDAD SANG ROXAS, Capiz (PIA) -- Gin-anunsyo ni Pangulong Ferdinand Marcos, Jr. sa iya pagbisita sa syudad sang Roxas sang nagligad nga Oktubre 6 nga kapin sa 10,000 ka mga mangunguma sa probinsya ang natalana nga magabaton sang bulig pinansyal karon nga tuig 2023 nagikan sa Department of Agriculture (DA) sa idalom sang Rice Farmers Financial Assistance (RFFA) nga programa.

Magluwas sa ginpanghatag nga bugas, ginpangunahan man sang presidente ang pagpanagtag sang kapin P70,000,000.00 nga balor sang nagkalain-lain nga mga serbisyo sang gobyerno.

Nahibaluan nga gin-aprobahan sang Presidente ang pagpagwa sang P12.7 ka bilyon para sa RFFA nga programa sang administrasyon ni Pangulong Marcos agud nga mabuligan ang mga magamay nga mga mangunguma nga mapasanyog ang ila produksyon.

Ginalauman nga ang tagsa ka kwalipikado nga mangunguma nga nalista sa Registry System for Basic Sectors in Agriculture (RSBSA) ang makabaton sang P5,000.00 sa idalom sang RFFA nga programa. (AGP/AAL/PIA Capiz)