TAGBILARAN CITY, Bohol, October 11 (PIA) – Bag-o na og regional manager ang National Irrigation Administration 7.

Kini diha nga gitugyan ni kanhi manager Engr. Reyne B. Ugay ngadto kang Engr. Rory F. Avance ang yawe sa katungdanan nga magdala sa entiro rehion 7, human siya matudlo sa nahisgutang nga posisyon, Agosto 25, didto sa us aka seremonyas nga gisaksihan sa mga tag-as nga opisyal sa NIA didto sa Sugbo.

Kini samtang si Ugay mobalik sa Central Office sa Manila aron mangulo sa Engineering Department isip Manager didto.

Si Ugay, kanhi manager usab sa Design and Specifications Division sa NIA nga didto mag-opisinahan sa Central Office. 

Sa laing bahin, si Avance, nailhan nga beterano nga regional manager human makompleto ang pagpangalagad sa susamang posisyon sa duha ka rehiyon:  Regional Manager sa NIA Region IX ug sa NIA Region VI.

Si Avance, gikan sa Region 12 kay taga Midsayap Cotabato, ug hinay nga mingsaka sa pwesto gikan sa pagka irrigation engineer, sobra na sa 30 ka tuig ang minglabay.

Nahimo siya nga Engineering and Operations Division Manager sa Region 12 sa wala pa saiya mosaka isip regional manager.

Dinhi sa Bohol, didto sa Joint System Management Committee and Convergence Meeting alang sa unang cropping sa 2024 sa mga nahisakop sa Bohol Integrated Irrigation System (BIIS), gitapok ug gipailaila si Avance sa mga NIA Region 7 BIIS Irrigators' Association (IA) Presidents, line agencies, LGU Mayors ug Municipal Agriculture Officers, uban sa mga stakeholders.

Kini aron usab kahisgutan ang mga plano sa mga mag-uuma ug sa kagamhanan alang sa pagpangandam sa El Niño, nga gilantaw nga mokusog pa sungod ning mga buwana.

Ang kalihukan, didto mahitabo sa Malinao Farmers Hall, Pilar, Bohol.

Si Avance mitanyag usab sa iyang technical nga inputs samtang nagsuporta sa pagplano aron makaabag sa mga mag-uuma nga makaani pa gihapon bisan pa sa taglisud.

Ang BIIS gilangkoban sa Bayongan Irrigation System sa San Miguel, Benliw ug Capayas Irrigation Systems sa Ubay, Malinao Irrigation Systems sa Pilar ug ang Talibon Irrigation Systems sa Zamora Talibon. (RAHC/PIA-7 Bohol)