TAGBILARAN CITY, Bohol, October 16  (PIA) -- Sa mga local nga kagamhanan nga may suliran sa pagpahimutang sa ilang informal settler families (ISF), nasayud ba kamo nga may proyekto nga mahimong ikatabang ang National Housing Authority (NHA)?

Ang NHA us aka ahensya nga responsible sa pangpubliko nga pabalay sa Pilipinas, ug mao ang production arm sa panginahanglan sa pabalay sa Pilipinas, pasabut ni Genesis Caesar Manalili, ang officer-In-Charge sa NHA Bohol.

Tuyo sa NHA ang paghatag og barato, dekalidad ug mas maayo nga pabalay sa mga Pilipino, ilabi na kadtong naapektahan sa mga kalamidad, o nanimuyo sa mga tumbok nga lugar nga delikado nga puy-an ug dili na patukoran pag mga balay, pasabut ni Manalili, didto sa Kapihan sa PIA.

Kini, maoy gitawag og Resettlement Assistance Program for Local Government Units (RAP-LGU).

Ang RAP LGU tubag sa NHA sa iyang mandatus ubos sa Republic Act No. 7279 o ang Urban Development and Housing Act of 1992 nga maghatag og financial ug technical nga tabang sa mga LGUs sa pagpatuman niini sa ilang urban development ug housing programs nunot usab sa gimbuhaton sa NHA nga mahimong enabler ug facilitator sa pagpahiluna sa mga katawhan sa proseso sa pag-angkon og balay, dugang ni Manalili.

Alang sa RAP LGU, sa koordinasyon sa LGUS, mahimong makatabang ang NHA sa pagpundo alang sa pabalay ug sa pagugmad sa yuta nga tarukan sa mga pabalay, samtang ang LGU ang maninguha nga makapangita og luna nga katukoran sa mga balay. 

Mahimo usab nga kining tanan ponduhan sa NHA, apan sa kadadhanon sa panginahanglan, nahukman nga ang land development iya sa NHA lakip na ang pagpatukod sa balay apan pundohan usab sa LGU ang land acquisition. matud pa ni Manalili.

"Igo-igo lang mao nga ila usab nga kinahanglang pa-inaton aron mas daghan ang makabenepisyo," pasabut sa Sugboanon nga hepe sa Bohol Field Office.

Gipadayag sa tinugyanan sa NHA nga ang lungsod sa Maribojoc pananglitan, ang mga kabalayan nga didto gipabarug sa kilid sa pantalan, karon naa napahimutang na sa usa  ka community sa Anislag, diin ang LGU may napalit nga yuta nga giugmad sa NHA aron katukoran sa labing menos 148 ka units.

Kay tuyo ang barato apan de-kalidad nga balay, ang Maribojoc Housing Board nagpahiluna nga may matigum usab sila nga pundo alang sa dugang pabalay mao nga nahukman nga mangkobra sila og tag P300 matag buwan aron masulod sa Trust Fund sa LGU alang sa dugang housing projects.

Ang duplex nga mga balay nagbarug sa 60 metro kwadrado nga lote ug may tag 32.5 metros kwadrado nga floor area ang matag balay, nga bayaran sulod sa 30 ka tuig.

Mahimo usab nga bayran og dinagko aron mas ma mubo pa ang lanat sa binayranan, subay sa aghat sa housing Board.

Matud ni Manalili, kompleto ang desinyo sa community, may probisyon na gani sa tricycle terminal, materials recovery facility, may10 metros nga kalapdon sa main roads ug 6.5 metros ang side roads, duna pod usab fire hydrants ug kaugalingon nga septic tanks ang matag balay.

Gawas sa Maribojoc, padayon usab ang pagsabutsabot sa NHA ug sa lungsod sa Trinidad nga naa nagpaabut na sa  second tranche, Carmen nga naa na sa Phase 2 ug ang Dagohoy nga may revised costing.

Labing dako nga mahatag sa NHA sa LGU nga may ikatugbang nga yuta ang P25M, saysay ni Manalili. (RAHC/PIA-7 Bohol)