LUNGSOD QUEZON, (PIA) --Nasa 815 graduates mula sa 12 National Certificate (NC) II courses ang nagsipagtapos sa ginanap na 25th Certification Day ng Pasig City Institute of Science and Technology (PCIST) Sta. Lucia at Manggahan, Miyerkules, Oktubre 25, 2023, sa Rizal High School Gym.

Sa ilalim ng temang sunod sa ika-450 Araw ng Pasig na Panahon ng Pasigueño, ang Certification Day ay nagsisilbing pagdiriwang ng kahusayan at determinasyon ng mga nagsipatapos sa kanilang mga napiling technical vocational course.

Pinangunahan nina Mayor Vico Sotto, Vice Mayor Dodot Jaworski, Jr., at Congressman Roman Romulo ang Certification Day kung saan ang bawat isa ay nagpaabot ng kanilang pagbati sa mga nagsipagtapos at kabilang din sa mga nag-abot ng Certificates sa mga ito.

Samantala, magkakaroon din ng Certification Days ang Barangay Computer Literacy Program at Livelihood Center bukas, October 26, 2023, at ang PCIST Bambang sa darating na Biyernes, October 27, 2023. (pasig pio/pia-ncr)