TAGBILARAN CITY, Bohol, January 11 (PIA) -- Duha ka cassava techno demonstration field days ang gipahigayon ning bag-o lang sa duha ka lungsod sa Bohol aron ipakita ang klase sa bag-o ug hinog na nga mga teknolohiya sa produksiyon sa balanghoy.

Ang techno demo nga gipahigayon sa Department of Agriculture Central Visayas (DA7) ubos sa Corn and Cassava Program, sa pakigtambayayong sa Office of the Provincial Agriculturist ug sa Municipal Agriculture Office, gitukod sa lungsod sa Sierra Bullones ug Dagohoy nga adunay luna nga 2-ektarya matag usa.

Ang balanghoy usa sa mga importanteng pananom nga pang-agrikultura sa nasud tungod sa nagkataas nga panginahanglanon, dili lamang nga tinubdan sa alternatibong pagkaon apan lakip na sa mga gamit sa industriya.

Ang farmer-cooperator nga si Desederio Legazpi sa lungsod sa Dagohoy, kinsa mihatag og pagtugot nga gamiton ang iyang lugar isip techno demo site, nipadayag sa iyang pasalamat sa DA.

“Dili natu sayangon ang ilang gihatag ug gi-tudlo kanato nga pamaagi sa panguma nga arun kita mag malambuon ug malungtad ang atong panginabuhian pinaagi sa pag uma,” matud pa ni Legazpi.

Si Roman Dabalos, ang Agricultural Program Coordinating Officer sa Bohol (APCO-Bohol) sa DA7 nagkanayon nga ang DA naghatag og suporta sa mga mag-uuma, dili lang sa produksyon sa balanghoy kon dili lakip na sa ubang mga agri commodities pinaagi sa paghatag og nagkalain-laing interbensyon.

Gidasig ni Dabalos ang mga mag-uuma sa pagpadayon sa pagtikad sa ilang yutang panguma.

Atol sa 10 ka buwan nga season field demo nga gisalmotan sa 17 ka mag-uuma gikan sa lungsod sa Sierra Bullones ug 35 ka mag-uuma sa Dagohoy, ang lakan ug golden yellow nga barayti gipaila tungod sa taas nga abot niini.

Ang mga teknolohiya nga gipaila naglakip sa mais ug balanghoy nga intercropping, husto nga gidaghanon ug ang panahon sa pag-abono ug ang gilay-on sa pagtanum, ug uban pa. (ECB/PIA7-Bohol)