TUBOD, Lanao del Norte (PIA)-- Gisugdan na sa provincial government dinhi pinaagi sa Public Employment Service Office (PESO), ang pagdawat og mga aplikasyon alang sa 2024 Special Program for the Employment of Students (SPES).
Tumong sa programa nga mahatagan ug kahigayonan ang mga estudyante ug out-of-school youth (OSY).
Gidisenyo ang programa alang sa mga indibidwal nga nag-edad og 15 ngadto sa 30 anyos, kinsa mga estudyante o OSY. Tumong sab sa programa nga magsilbi isip plataporma alang sa pagpalambo sa kahanas sa mga benepisyaryo ug pakiglambigit sa komunidad.
Ang mga rekisitos mao ang duha ka kopya sa SPES application form, passport-sized ID picture nga adunay nametag (non-computer generated), pinakaulahing grado (semestral para sa mga estudyante sa kolehiyo, ug gikan sa miaging school year o Form 137 para sa junior/senior high), certificate of indigency, ug birth certificate.
Ang mga aplikante sa SPES Babies o kadtong na-hire sa miaging tuig ug nahuman o adunay labing menos 37–40 ka adlaw nga attendance kinahanglan nga mosumite sa ilang SPES ID samtang ang mga aplikante nga OSY kinahanglan nga mosumite sa ilang Certificate of OSY gikan sa ilang mga barangay.
Giawhag sa provincial government ang tanang kuwalipikadong indibidwal sa pagpahimulos sa programa ug pagsumite sa ilang aplikasyon sa PESO Office nga nahimutang sa 1st floor sa Provincial Capitol Building sa dili pa ang Enero 31, 2024. (LELA/PIA-10/Lanao del Norte)
