SAN JOSE, Antique (PIA) -- Ang Department of Labor ang Employment (DOLE) nagtao kang kantidad nga P19,822,666 para sa 1,394 ka mga pobre nga pamilya para sa pagtukod ukon pagpadayon kang anda parangabuhian sa idalom kang programa nga DOLE Integrated Livelihood and Emergency Employment Program (DILEEP).

Suno kay DOLE Senior Labor and Employment Officer Benjie M. Requintina, 20 porsyento kadyang benepisyaryo nga mga pamilya may mga kabataan nga naga-obra sa mabudlay kag delikado nga orubrahan, gani ang dya nga proyekto makabulig gid kananda para sanda malikaw sa katalagman.

May kabilugan nga 422 ka mga interns nga nabaton ang DOLE kag dya gin-assign sa sari-sari nga opisina kang gobyerno.

Para naman sa pagpatuman kang Child Labor Prevention and Elimination Program (CLPEP), ginhambal ni Requintina nga may 935 nga mga kabataan kag andang pamilya nga nabuligan ang DOLE para mahaw-as sanda ka mabudlay kag delikado nga trabaho.

Samtang ang “Project Angel Tree” nakabulig man sa 241 ka mga pigado kabataan sa mga banwa kang Bugasong Pandan and Tibiao kag sanda dya nakabaton kang regalo parehas kang mga kagamitan sa pag-eskwela, pagkaon, kag iba pa. (AGP/PSM/PIA Antique)