TAGBILARAN CITY, Bohol, January 4 (PIA) -- Tukuron dinhi sa Bohol ang National Fire Training Institute sa Bureau of Fire Protection (BFP) didto sa gidonar nga lote sa lungsod sa Ubay, kini maoy kasayuran nga gipaambit sa BFP sa labing bag-o nga tigum sa Provincial Disaster and Risk Reduction Management Council, sa miaging semana.

"Daku nga bentaha ang masinati sa mga Bol-anon kon matukod na ang NFTI sa 1.3 ektaryas nga luna nga gidonar sa lokal nga kagamhanan sa Ubay pinaagi ni Mayor Constantino Reyes," matud pa ni Fire Chief Inspector Servando Jumawid didto sa tigum.

Dugang niya, "ang mga bag-o nga recruits karon, gikinahanglan pa nga magpaabut kanus-a tawagon sa ilang training schedule sa NFTI sa Camp Vicente Lim sa Calamba Laguna, nganhi na mabansay."

Gawas sa bentaha, ang Bohol usab mahimo nanga modawat sa mga trainees gikan sa ngakadaiyang lugar sa Visayas ug Mindanao, nga magdala usab sa kaayohan ngadto sa Ubay ug sa mga dapit diin ang mga bag-ong bombero makadeploy.

Gawas sa NFTI nga adto tukoron sa Ubay, magtukod usab ang BFP sa Provincial Fire Station didto sa usa  ka luna nga gihatag sa kagamhanang Probinsyal sa Bohol didto sa Cortes.

"Wala pay Provincial Fire Station alang sa Provincial Fire Marshal, ug squatter kita sa kanhi Tagbilaran City Airport," butyag ni Jumawid atubangan sa mga sakop sa konseho.

Kasamtangan nga may 646 ka personnel na ang BFP, may 62 ka personahe niini nga nabansay sa Emergency Medical Services (EMS), may 92 ka fire trucks nga naka deploy sa mga kalungsuran.

Gani, matud niya, ang tanan na nga mga kalungsuran sa Bohol aduna nay kaugalingon nga fire stations, bisan pa man nga dili tanan niini naka-angkon na sa typical fire station nga gidesinyo sa BFP.

Ang mga bomberohan sa Lila, Diliao ug Candijay maoy mga bag-o nga typical fire stations nga gitukod sa BFP dinhi sa Bohol, samtang gipaabut na usab ang pagtukod sa daku nga fire station sa Tagbilaran City, matud ni Jumawid. (RAHC/PIA7 Bohol)