TAGBILARAN CITY, Bohol, January 9 (PIA) -- Subay sa dalan nga gitaak sa amahan niyang kanhi gobernadora, walo ka dagko nga proyekto ang giduso ni Gobernador Erico Aristotle Aumentado alang sa pagpundo niini sa Japan International Cooperation Agency (JICA).
Sa iyang paghural sa posisyon human nakadaug isip gobernadora, giangkon sa batan-ong Aumentado nga nagbarug siya ilawom sa anino sa iyang amahan, kinsa gi-danggaan og ang goberandor sa mega projects sa Bohol.
Niining bag-o lamang, gikatagbi sa batang-ong Aumentado ang tinugyanan sa Japanese Ambassador nga si Sen Yano, aron ipresentar and mga proyekto nga gilantaw sa Bohol nga makapa-ugpot pa sa lalawigan ngadto sa dakung kaugmaran.
Ang JICA usa ka ahensya sa kagamhanan sa Hapon nga magtanyag sa tabang pangkaugmaran ngadto sa mga nasud sa Asya, Africa ug uban pang mga rehiyon nga nanginahanglan niini.
Kanhiay pa nga napangayoan sa Bohol og pundo alang sa mga dagkong proyekto niini, ang JICA usa sa mga may daku nga tabang sa amahan niining gobernador.
Kalakip sa mga giduso nga proyekto nga pundohan mao ang Feasibility Study alang sa Wastewater Management ug Sewerage System sa Tagbilaran City ug isla sa Panglao, ang Bohol Bulk Water Supply Project, ang Bohol Integrated Highway nga magsilbe nga ikaduhang Circumferential Highway sa Bohol, ug ang Feasibility Study alang sa Light Rail Transit: Monorail System nga magsumpay sa bag-o nga Panglao Bohol International Airport ngadto sa mga strategic nga lugar sa Bohol.
Buot usab ug giduso nga papundohan ang Feasibility Study alang sa Comprehensive Integrated Flood Control System sa mga kalungsuran sa Bohol pinaagi sa paggamit sa Sabo Dam Technology, ang Pagtukod sa Inter-Island nga mga tulay ug karsada tadlas sa mga kabukiran sa Bohol, ang Ubay Airport Development Project nga magsilbe nga secondary feeder airport nga may pasiunang P56M nga pundo gikan sa CAAP ug ang Northern Bohol Light Industry Ecozone gikan sa Getafe, Talibon, Trinidad, Ubay, Pitogo ug Bien Unido.
Kasagaran usab niining mga pundohanan, nakalabang na sa Provincial Development Council, ug ang uban naduso na usab sa Regional Development Council alang sa endorsement niini sa National Economic Development Authority. (PIA Bohol)
