TAGBILARAN CITY, Bohol, January 2 (PIA) -- Wala nay tulubagon pa ang Department of Public Works and Highways (DPWH) sa mga tag-iya sa mga yuta ug kabahin niini nga maapil sa dalan ug sa shouldering niini kon trabahoon na ang duha  ka seksyon sa mga provincial roads nga i-convert ngadto sa nasudnong dalan.

Kini ang gipaklaro sa DPWH ngadto sa mga Bol-anon human minghangyo ang kagamhanang Probinsyal pinaagi sa Sangguniang Panlalawigan (SP) sa pag-endorso ug pagpasupot sa conversion sa mga kabahin sa Provincial Roads nga molagbas ngadto sa national highways nga itugyan na sa nasudnong kagamhanan.

Kahinumduman nga giduso sa SP ang Resolusyon No 2022-670, nga mipabor sa pagendorso ngadto sa Kongreso ang sugyot nga himoon nga national road na ang gikan sa eskina sa Loay Interior Road ngadto na sa Mahayag, San Miguel paingon sa Danao ug  ang gikan sa eskina sa Loay Interior Road paingon sa  Bayongan, subay sa Bugang, San Miguel ngadto lagbas sa Gabi, ug San Pascual, Ubay, Road.

Apan, subay sa lagda sa DPWH, gikinahanglan nga wala nay galastohan pa ang DPWH sa pagpamayad sa mga yuta nga maagi-an sanglit wala kini pahat alang niini sa ilang mga proyekto nga naglambigit lamang sa  mga tulay, culvert o imburnal, kalsada ug ang embankments lakip na ang shouldering niini.

Sa usa  ka suwat gikan ni Engr. Fernando J. Talagsa, officer in-charge sa Office of the District Engineer, DPWH Bohol 2nd District Engineering Office, gipangayo niini sa SP ang pagpasa og resolusyon nga magtumbok nga ang DPWH dili na manginlabut sa bisan unsa nga claims sa mga tag-iya sa  mga yuta nga maagian sa mga nahigutang karsada.

Subay usab sa mga rekisitos nga  gilagda sa Department Order No. 133, series of 2018, tataw nga walay kwarta sa ahensya nga gamiton sa Road Right Of Way (RROW) acquisition, ilabi na sa pagconvert sa provincial roads ngadto sa national roads nga nahisakop sa Bohol 2nd District Engineering Office.

Niining suwat, gitigum sa SP ang Committee on Public Works and Higways and Related Infrastructure aron tuki-on ang suwat sa DPWH  pinetsahan Octobre 26, 2023.

Sa tigum sa committee niadtong Disyembre 7, 2023 nga gitambongan nila ni Board Members Nathaniel O. Binlod ug Greg Crispinito L. Jala, Provincial Engineer Camilo L. Gasatan, Provincial Legal officer Atty. Paul Magallano, ug Engr. Rolando Cericos sa Bohol 2nd District Engineering Office ug ang committee secretariat, napadayag sa DPWH nga wala mabutang sa Resolusyon ang kabahin sa mga tulubagon ilabi na sa Road Right Of Way (RROW). 

Matud sa DPWH nga ila na nga pagasugdan ang pagsurvey aron ilhon ang mga parcela sa yuta nga mapingisan ug matuhog sa karsada ug mga embankments niini subay usab sa detailed road design plans ug magpa-ambit usab niini nga survey ngadto sa Provincial Engineering Office (PEO).

Kini aron ang PEO mao nay makig-coordinate ug makigsabut sa Provincial Assessor’s Office alang sa pagkaltas sa mga buhisan sa mga tag-iya sa yuta nga maapektohan sa karsada ug makatabang sa paghipno sa deed of donation alang niini.

Matud pa ni Binlod, ilang iduso ngadto sa SP ang resolution nga magpatin-aw nga ang DPWH wala nay responsibilidad sa mga obligasyon sa mga claims nga mosulbong ilabi na kabahin sa RROW. (RAHC/PIA7 Bohol)