TAGBILARAN CITY, Bohol, January 15 (PIA) -- Ang Department of Transportation (DOTr) nanghatag og tabang sa mga drayber ug operator nga napakyas sa pagkonsolida sa ilang mga prangkisa ubos sa Public Utility Vehicle Modernization Program (PUVMP).

Si Office of Transportation Cooperatives (OTC) Chairman Jesus Ferdinand Ortega nagkanayon sa press briefing sa Malacañang adlaw’ng Lunes nga lakip sa mga programa nga gipatuman sa DOTr uban sa tabang sa ubang mga ahensya naglakip sa “EnTSUPERneur” program sa Department of Labor and Employment (DOLE) ug ang “Tsuper Iskolar” sa Technical Education and Skills Development Program (TESDA).

Matud pa ni Ortega nga ang maong mga inisyatiba gitumong sa pagpalambo sa panginabuhian sa mga drayber ug operator sa pampublikong transportasyon nga apektado sa PUVMP.

“So we’ve improved the program by instead of… I mean instead of, or puwede na ngayon i-avail and dalawang program ng gobyerno," matud pa ni Ortega.

Gipasabot niini nga mahimo silang mopahimulos sa programa nga gitakda sa DOLE ug sa TESDA.

Matud pa nga alang kini sa mga apektado, bisan driver o operator labi na kadtong wala nag-consolidate.

Nakig-alayon ang DOTr sa DOLE sa paglusad og alternatibong livelihood program alang sa mga naapektuhang mga trabahador taliwala sa PUV Modernization Program ug sa coronavirus pandemic.

Ang DOTr nipondo sa “EnTSUPERneur” aron matabangan ang Labor Department sa pagpatuman sa DOLE Integrated Livelihood Program (DILP), nga nagtinguha nga mahatagan og kapital ug capacity building sa panginabuhian ug entrepreneurship ang mga apektadong trabahante.

Sa laing bahin, ang Tsuper Iskolar program sa TESDA nagtumong sa paghatag og mga scholarship ug livelihood training sa mga drayber, operator ug ilang pamilya. (ECB/PIA7-Bohol)