TAGBILARAN CITY, Bohol, January 15 (PIA) -- Usa ka travel agency nga nakabase sa Amsterdam, The Netherlands ang nag-post og prediksyon nga ang isla sa Panglao sa lalawigan sa Bohol maapil sa top 10 nga trending destinasyon sa mga byahero sa 2024.

Gihulagway ang Panglao isip “a petite tropical gem” o usa ka gamay nga tropikal nga hiyas, ang Booking.com nagpasiugda sa mga baybayon sa Alona ug Danao, ingon man sa mga kalihokan sa gawas, island hopping tours ug world-class diving spots.

Gitumbok usab sa travel agency ang isla sa Panglao isip pinakalunhaw nga destinasyon sa Pilipinas, maayo alang sa mga magpapanaw nga nangita og hayahay nga kasinatian sa kinabuhi sa isla samtang gihinumdoman ang pagpanalipod sa kinaiyahan.

Ang listahan naglakip sa Beppu sa Japan, Valkenburg sa Netherlands, Vlorë sa Albania, Chemnitz sa Germany, Rotorua sa New Zealand, Cairns sa Australia, Buenos Aires sa Argentina, Portland sa USA, ug Mérida sa Mexico.

Ang listahan sa 10 ka under-the-radar nga mga lokasyon sa tibuok kalibotan gibase sa mga ranking niini sa usa ka global nga pagtuon nga naglambigit sa 27,000 ka mga biyahedor sa 33 ka nasod, ang artikulo sa balita nga gipatik sa usa ka global news outlet miingon.

Ang nag-una nga trending nga mga destinasyon sa Booking.com alang sa 2024 nga datos gibase sa year-on-year growth rate o tuig-sa-tuig nga rate sa pagtubo sa pipila sa labing gi-book nga mga lokasyon sa plataporma niini, ang gipagawas nga artikulo nag-ingon.

Gilusad niadtong 1996, ang booking.com maoy usa sa pinakadakong online travel agencies ug ang mobile app niini maoy usa sa labing na-download sa travel agency nga kategorya. (ECB/PIA7-Bohol)