DAVAO CITY (PIA) -- Sa tinguha nga mapalambo ang programa sa sports sa nasud, malamposong naduso ni Senator Christopher Lawrence “Bong" Go ang budget alang sa National Athletes and Sports Development sa tuig 2024.

Isip chairperson sa Senate Committee on Sports sa Senado, gikalipay sa Senador nga na aprobar ang igong budget sa tuig 2024 alang sa mga programa sa sports, hilabina sa grassroots level.

Nakakuha og pagsaka sa pondo ang Philippine Sports Commission (PSC) gikan sa P174 milyones ngadto sa P1.156 bilyones nga na aprobahan sa General Appropriations Act (GAA).

Lain pang P40 milyones nga budget ang igahin alang sa Batang Pinoy ug P50 milyones alang sa Philippine National Games.

Adunay pod gi alokar nga P174 milyones alang sa financial assistance, community sports development, sports festival ug uban pang mga aktibidades sa sports.

Gihatagan sab og dugang pagtagad ni Go ang pag sumpay sa sports development ug programa sa pag promote sa usa ka fit ug healthy lifestyle sa mga kabataan aron mapalayo sila sa mga piligro sa pag gamit sa illegal nga droga.

Palapdan sab sa Senador ang balaodnon nga adunay plano sa pag institutionalize sa Philippine Games ug sa Batang Pinoy, ug ang pagpalambo sa sports development sa grassroots level. (ETI/ PIA-XI/OSBG)