TAGBILARAN CITY, Bohol, January 17 (PIA) -- Gi-awhag sa Department of Social Welfare and Development (DSWD) ang mga benepisyaryo sa Pantawid Pamilyang Pilipino Program (4Ps) nga gustong mopadayon sa mas taas nga edukasyon sa pagpahimos sa mga programa sa suporta sa tertiary education sa gobyerno nga makatabang nila sa ilang galastohan sa eskwelahan.

Si DSWD Assistant Secretary for Strategic Communications Romel Lopez miingon sa usa ka pamahayag nga ang mga benepisyaryo sa 4Ps mahimong makapahimos sa nagkalain-laing educational assistance programs gikan sa Commission on Higher Education (CHED) lakip na ang mga scholarship, grant-in-aid, ug student loan programs.

Si Lopez, kinsa mao usab ang tigpamaba sa DSWD, miingon nga kini nga mga programa nagtumong sa pagpalambo sa akses sa kalidad nga edukasyon alang sa mga kwalipikadong benepisyaryo sa flagship anti-poverty program sa nasud pinaagi sa pagpagaan sa pinansyal nga palas-anon sa mga takos nga mga indibidwal nga nagtinguha sa pagpadayon sa mas taas nga edukasyon.

Matud niya nga kini nga mga programa gitanyag sa mga kwalipikado ug angayan nga mga kabus nga households, lakip ang mga benepisyaryo sa 4Ps, sa Unified Student Financial Assistance System for Tertiary Education (UniFAST), usa ka attached agency sa CHED nga naghiusa ug nagharmonya sa mga programa sa tabang pinansyal sa mga estudyante nga gipundohan sa gobyerno (StuFAPs).

Gidugang pa ni Lopez nga ang pagpamuhonan sa tertiary education alang sa mga benepisyaryo sa 4Ps usa ka puhonan alang sa kaugmaon sa ilang tagsa-tagsa ka panimalay ug usa usab ka lakang sa pagkab-ot sa tumong sa 4Ps nga mamenosan ang kakabos pinaagi sa akses sa libreng edukasyon.

Gihatagan og gibug-aton ni Lopez nga ang mga benepisyaryo sa 4Ps mahimong makapahimos sa libreng higher education sa bisan asang State Universities and Colleges (SUCs) ug CHED-recognized Local Universities and Colleges (LUCs), subay sa Republic Act 10931 nga nagpagawas sa mga estudyante sa pagbayad sa tuition ug uban pang bayronon sa eskwelahan.

Kon sila kwalipikado, ang mga benepisyaryo sa 4Ps mahimong makadawat og subsidy nga labing menos P20,000 matag academic year aron matabonan ang ilang partial cost sa school fees ug education-related expenses.

Laing programa nga gitawag og Tulong Dunong Program (TDP) mahimo usab nga opsyon alang sa mga benepisyaryo sa 4Ps, nga mahimong maghatag kanila og labing taas  P15,000 nga grant alang sa usa ka academic year.

Gipasabot ni Lopez nga ang mga benepisyaryo mahimong kwalipikado alang sa mga grants ubos sa TDP kung wala sila makadawat sa bisan unsang CHED ug UniFAST nga education support program.

Sa tanan niini nga mga programa nga magamit alang sa mga kwalipikado nga mga kabus nga panimalay, si Lopez nag-awhag sa mga benepisyaryo sa 4Ps sa pag-apply ug pagpahimos sa mga programa aron sila makapadayon sa ilang taas nga edukasyon uban ang suporta sa gobyerno. (ECB/PIA7-Bohol)