SYUDAD SANG ROXAS, Capiz (PIA) -- Ginpatapakan sang patrol car sang kapulisan ang 267 ka mga "boga" kag ginbutang sa drum sang tubig ang 2,271 ka mga iligal nga palupok.
Ini bilang pamaagi sang pagpangguba sang mga nakumpiskar nga iligal nga mga palupok sang Capiz Police Provincial Office sadtong Enero 7 sa Camp Teodorico Apil diri sa syudad sang Roxas kaangot sa "Oplan Iwas Paputok" nga kampanya sang gobyerno.
Ginpahayag ni Maj. Maila Dela Cruz nga Public Information Officer sang CPPO nga wala sang "label" ukon brand ang mga nadakpan nga mga palupok.
Samtang naglab-ot sa 19 ang mga biktima sang palupok kag boga sa probinsya wala sapayan sang maid-id nga kampanya nga mapanubo ang mga kaso sang Fireworks-Related Injuries sa selebrasyon sang Paskwa kag pagpaabot sang bag-ong tuig.
Ang nasambit nga numero sang FWRI sa probinsya ang ginalakipan sang isa ka napatay bangud sang "loss of blood" matapos patal nga nasamaran sang nalukpan sang ginkolekta nga mga palupok kag mas mataas sang 26.26 ka porsiyento kon ipaangid sa kapareho nga inadlaw nga pagmonitor sang Provincial Health Office sang tuig 2022.
Ang mga FWRI nga kaso sa probinsya ang nagabug-os sa 294 ka mga natala sa bug-os nga rehiyon.
Nahibaluan nga 10 sa 17 ka mga lokal nga panguluhan ang may kaso sang FWRI sa Capiz nga ginalakipan sang Roxas City (5) kag mga kabanwahanan sang Dao (3), Pilar (2), Pontevedra (2), Mambusao (2), Dumarao (1), Jamindan (1), Panay (1), Panitan (1), kag Sapi-an (1).
Suno sa report sang PHO, naglab-ot sa 13 sa mga nalukpan sang palupok ang aktibo nga imbolbado sa paggamit sang firecracker kag boga. (AGP/AAL/PIA Capiz/Photo courtesy of the Capiz PNP)
