SYUDAD SANG ILOILO -- Tatlo ka mga kabanwahanan sa probinsya sang Guimaras ang ginpasidunggan bilang Gawad Kalasag awardees bangud sa paging ekselente kag pagpakita sang kinaadman sa patag sang disaster risk reduction and management kag humanitarian assistance.

Ang mga kabanwahanan sang Buenavista, Nueva Valencia, kag Sibunag ang ginkilala sang Office of Civil Defense (OCD)-6 bangud sa "Fully Compliant" rating.

Nalakip man sa 56 ka mga local government units sa rehiyon ang ini nga mga kabanwahanan sang Guimaras nga nakapasar sa regional validation sang ika-23rd nga Gawad KALASAG Award.

Ginakabig ang Gawad KALASAG Search nga primero nga annual awards sang pungsod sa mga nagkalain lain nga mga stakeholders nga nagabulig pasanyog sang pagpatigayon disaster risk reduction and management, climate change adaptation (DRRM-CCA), kag humanitarian assistance nga mga programa. Tinutuyo sang ini nga mga hilikuton ang pag-amlig sa mga high-risk nga mga komonidad batok sa katalagman kag pagbulig sa paghatag solusyon sa ila nga mga vulnerabilities sa kalamidad. (AAL/LMLE/PIA Iloilo)