SYUDAD SANG ILOILO -- Ang pagatukodun nga mga teen center buildings sa banwa sang Balasan kag San Dionisio mangin isa ka pamaagi sa pagsuporta sang mga hilikuton sang mga pamatan-on, kag mapa-uswag ang ila ikasarang kag personalidad.

Ginpangunahan ni Gov. Arthur Defensor Jr. ang paghiwat sang groundbreaking ceremonies sa pagpatukod sang teen center buildings sa Cabalic National High School sa Balasan kag Nicomedes R. Tubar Sr. National High School sa bahin sang San Dionisio.

Ang tagsa kga mga building nagabalor sang P3.5 milyon.

Ginatuhoy ang ini nga pasilidad ni Gov. Defensor bilang “a home outside our own house” kag magaserbisyo ini sa mga programa sang probinsya angot sa adolescent health kag youth development.

Mangin kaundan sang teen center ang Career Guidance and Counseling Program kag Voter’s Education Program nga inisyatibo ni Defensor sa idalom sang Bulig Eskwela sang Probinsya (Bes Probins) nga programa.

Samtang, ang pasilidad sa Nicomedes R. Tubar Sr. National High School magatatap sang 2,087 ka mga bumulutho sa 13 ka mga barangays.

Nagtalana naman ang gobyerno probinsyal sang P35 milyon nga pondo para sa pagpatukod sang mga teen center buildings sa probinsya kun sa diin duwa ka pasilidad ang pagatukoron sa kada distrito.

Pagasangkaron man ang Special Education Program sa pagpatindog sang mga hulot-klasehan kag iban pa nga mga pasilidad nga kinahanglanon sang pampubliko nga mga buluthuan sang probinsya.

Sa bahin ni Provincial Population Office chief Atty. Ruel Von Superio, ang mga teen centers magaserbe nga duog sa pagpaalintun sang mga ideya kag pasilidad sa pagtapna sang mga risky sexual kag non-sexual behaviors sa mga pamatan-on.

“The Teen Center 2.0 is a level-up version of our old teen centers, which we will rebrand later – and to be known as the Adolescent Health and Youth Development Centers of the province,” suno kay Atty. Superio.

Ang ini nga proyekto pagalakipan man sang Lounge Area, Counseling Room, Activity Area, Guidance Office, Teen Center Coordinator Office, kasilyas, kag pantry. (AAL/LMLE/PIA Iloilo)