CAMIGUIN (PIA)-- Aron mapalambo ang kultura sa pagbasa ug mapalambo ang mahinungdanong kahanas sa mga magtutuon isip kabahin sa National Reading Program, ang Department of Education (DepEd) Division sa Camiguin mipaila sa "Catch-up Fridays" niadtong Enero 12.
Ubos sa National Learning Recovery Program (NLRP), ang pagpatuman dungan sa pagsaulog sa tibuok nasud sa "Drop Everything and Read (DEAR) Day."
"DepEd Camiguin started to implement this initiative to provide learners with the opportunity to engage in independent silent reading of their preferred material," ingon ni Schools Division Superintendent Rosemarie T. Macesar.
Ang programa nagtumong sa pagpalig-on sa sosyal, pundasyon, ug uban pang may kalabutan nga mga abilidad nga gikinahanglan alang sa pagkab-ot sa mga katuyoan sa batakang kurikulum sa edukasyon. Ang nag-unang tumong niini mao ang pagtabang sa mga estudyante nga mahimong mas hanas nga tigsulat, kritikal nga tighunahuna, magbabasa, ug analista.
Sa pagkutlo sa kamahinungdanon sa pagpahigayon sa nasangpit nga aktibidad, usa sa mga tinun-an sa Camiguin National High School miingon, "Kasagara sa mga kabataan karon dili kabalo'g kabasa, and aside from improving our reading skills, I think it also helps strengthen our relevant skills."
Ang opisyal nga mga giya alang sa maong programa anaa sa DepEd Memorandum No. 001, s. 2024, nga nag-ingon nga ang tibuok buwan sa Enero ipahinungod sa kalihokan. Kini nga dokumento naghatag ug kinatibuk-ang paglantaw sa programa sa Catch-up Fridays, nga naglatid sa mga tumong niini, gipaabot nga mga resulta, ug ang papel sa mga magtutudlo sa pagpahigayon sa mga sesyon.
Ang DepEd Camiguin naglaum nga ang "Catch-up Fridays" makatabang sa mga tinun-an sa pagpalambo sa tibuok kinabuhi nga gugma sa pagkat-on ug pagbasa dugang pa sa ilang academic progress. Ang mga katuyoan sa programa nahisubay sa National Learning Recovery Program, nga nagtumong sa paghatag komprehensibo nga suporta alang sa mga estudyante sa tibuuk nasud ug pag-atubang sa mga babag sa edukasyon nga dala sa pandemya. (RTP/PIA-10/Camiguin)
