TAGBILARAN CITY, Bohol, January 26 (PIA) -- Sa paggamit sa wala kapahimusli nga yuta ngadto sa mga communal garden nga adunay mga input nga gihatag sa Department of Agriculture-Special Area for Agricultural Development (DA-SAAD) sa Central Visayas, ang 25 ka mga mag-uuma nga miyembro sa Nagkahiusang Mag-uuma sa Basacdacu sa Barangay Basacdacu, lungsod sa Alburquerque nag-ani na karon sa mga bunga sa ilang mga tanom diin nikita sila og gross income nga P4,665 gikan sa unang ani.
Tulo ka buwan ang milabay gikan niadtong Oktubre 2023, ang asosasyon nakadawat sa SAAD 2023 Integrated Cattle Fattening and High-Value Crop Production nga proyekto nga nagkantidad og P3,070,992.50 diin ilang gigamit ang 5,000 square meter nga wala gigamit nga yuta, nga gipanag-iya sa usa sa mga miyembro niini, ngadto sa produktibong communal garden uban sa tabang sa mga kawani sa Municipal Agriculture Office (MAO) Alburquerque sa pagpanguna ni Windyl N. Malaran ug Erie S. Penticase.
Nananom sila og mga utanon sama sa ampalaya, string beans, talong, okra ug bell pepper nga gihatag sa SAAD.
Gawas niini, nakadawat usab sila og 10 ka grass cutter, 25 ka sako sa complete fertilizer, 10 ka sako nga muriate sa potash, 50 ka water sprinklers, 25 ka pick mattocks, ug 25 ka plastic drums isip suporta sa communal gardens.
Sa wala pa giila nga mga benepisyaryo sa SAAD, kini nga mga miyembro sa mag-uuma naa sa indibidwal nga pagpananom sa utanon alang sa kaugalingon nilang konsumo.
Karong buwan sa Enero 2024, alang sa ilang unang ani sa ampalaya ug string beans, mokita sila og P4,665.00 gikan sa pagbaligya sa tabo o market day sa lungsod.
Ang tanan nga kinitaan gikan sa mga gitanom, maadto sa tigom sa asosasyon nga gipasiugdahan ug gipangunahan sa ilang presidente nga si Chona Maria L. Ras uban ang panag-uyon sa mga miyembro.
Aron matukod ang maayong pagdumala ug organisado nga mga kalihokan sa pagpanguma, ang mga miyembro sa FA kinahanglang moapil sa pag-andam sa yuta, pagtikad ug pagpadaghan sa binhi.
Alang sa sistematikong pagdumala sa umahan, gibahinbahin ang mga miyembro sa mga grupo diin ang matag (grupo) kinahanglan nga mobuhat sa mga bulohaton sama sa paglimpyo sa umahan, pagbisbis sa mga luna sa tanaman, ug pag-ani sa mga utanon, kaduha sa usa ka semana.
“Nagpasalamat ko og dako sa programa sa SAAD farmers nga kami ang napili sa ilang gitabangan kay dako kaayo ang tabang nga ilang nahatag kanamo. Sa ginagmay nga pangsuporta sama sa mga gulay, kami dili na mamalit og mga utanon sa merkado ug makaincome pa mi,” pahayag ni Mrs. Ras.
Plano sa asosasyon nga gamiton ang ilang inisyal nga kinitaan sa pagpalapad sa ilang produksiyon sa panginabuhian pinaagi sa pagtanom og uban pang klase sa mga pananom aron sila makatukod og community-based enterprise alang sa SAAD Program Phase 2.
Ang SAAD Program usa ka lokal nga gipundohan nga proyekto ubos sa DA nga nagtutok sa pinaka-marginalized nga sektor sa agrikultura ug pangisda sa nasud.
Tuyo niini nga maminusan ang kapobrehon pinaagi sa pagpataas sa produksiyon sa pagkaon ug produktibidad sa mga target nga lugar pinaagi sa paghatag ug tukma nga teknolohiya, financing, marketing ug uban pang serbisyong suporta aron mahimong produktibo ug mokita ang mga mag-uuma ug mangingisda. (ECB/PIA7-Bohol)
