ILIGAN CITY (PIA) -- Upat ka gatos ka mga magtutungha sa Barangay Mainit ning dakbayan ang nakadawat og mga hinabang pinaagi sa outreach program.

Ang mga magtutungha gikan sa Lower Mainit Elementary School, Mainit Elementary School, Rebucon Elementary School, Pudog Elementary School, ug Ampucao Elementary School.

Gipanguluhan sa Women and Children Protection Desk sa Iligan City Police Office (ICPO), kauban ang city government, Department of Education, 2nd Mechanized Infantry Brigade, Philippine Coast Guard, 55th Engineer Brigade, Motivation Philippines, AJG Security Agency Corporation, J4S Security Agency, and Rotary Club Iligan South, ang maong outreach program aron maghatag ug serbisyo sa mga hilit nga barangay.  

“Nakaline-up ni sa program sa WCPD naghatag ug information labi na sa kabataan ug kababaihan sa barangay nga naay ahensya sa goberyno, particularly ang Philippine National Police (PNP) nga naghatag ug proteksyon sa mga kabataan ug kababaihan nga nakaexperience ug violence,” sumala ni ICPO City Director Police Colonel Reinante Delos Santos.

Samtang, sumala ni  Police Regional Office-10 Regional Community Affairs Development Division Chief PCol Reynante Reyes, ang maong kolaborasyon nagpakita sa  holistic approach para sa community engagement. Matod niya, importante kini aron mapakita sa mga residente sa mga hilit nga lugar nga anaa ang gobyerno nga mutabang ug muserbisyo kanila.  

Nakadawat ang mga magtutungh og  school supplies, dulaan, hygiene kits, food packs, tambal, tsinelas, sanina, raincoats, ug rain boots. Aduna sab libreng tuli ug alot, libreng checkup ug legal consultation. Nagpahigayon sab ug drawing and reading activity para sa mga bata. 

Mapasalamaton sab ang mga residente sa mga   serbisyo nga gipaabot kanila.

“Nalipay mi. Dako kaayo ning tabang sa amo nga mga pobre kay layo kaayo  diri. Maayo gani dinhi daghan kaayo ug hinabang,” sumala ni  Erlinda Lundahan.

Nalipay ug nagpasalamat sab si Rosemio Pagara  nga bisan pa sa hagit nga kahimtang sa dalan ug panahon, niabot ang nagkadaiyang serbisyo sa ilang komunidad.

Nananom sab ang mga stakeholder ug mga punuan sa Mainit Elementary School. (LELA/PIA-10/Lanao del Norte)