May 20 man ka mga manugpangisda nga nakabaton kang bunit kag nylon lines nga magamit sa multiple handline fishing, samtang nakabaton man ang iban kang gillnet, palutaw ukon rubber floats, kag pabug-at ukon sinkers para sa gillnet fishing.

Nagtugro man ang BFAR kang kagamitan para sa papaitan ukon salt-making kaangay kang cheesecloth, balde, trapal, bamboo basket, 200-liter plastic drums, sack-sewing machine, kag water pump.

Sa kabilugan, may kapin 60 ka mga manugpangisda sa banwa kang Pandan ang nakabenepisyo sa dyang bulig kang BFAR sa idalom kang National Fisheries Program kag Development of Salt Industry Project.

Suno kay Aileen Garcia, aquaculturist sa BFAR Antique, ang dya nga proyekto sangka produkto kang pagpakigbahin kang komunidad sa mga inisyatibo kang gobyerno bangud ang mga benepisyaryo mismo ang nagpili kang bulig nga anda nabaton.

Sa anang parte, ginpasalamatan ni Pandan Mayor Tomas Estoperez, Jr. ang BFAR kag sanday Senate President Pro Tempore Loren Legarda kag Congressman Antonio Legarda Jr. para sa pondo kag suporta sa sektor kang pagpangisda sa probinsya.

Nagpalab-ot man kang andang pagpasalamat ang iban pa nga mga benepisyaryo sa gobyerno sa bulig nga anda nabaton para sa pagpamayad kang andang parangabuhian. (AGP/BPS/PIA Antique)