LINAMON, Lanao del Norte (PIA) -- Bibo nga gisaulog sa mga residente dinhi ang Hudyaka sa Lubi Festival subay sa 64th founding anniversary sa lungsod.
Gibida sa selebrasyon ang nagkadaiyang costumes ug props gamit ang lubi ug ang pagpasigarbo sa buko pie nga produkto sa maong lungsod.
Nagtigi ang walo ka barangay sa lungsod sa festival dance competition ug festival queen competition.
Gideklarang grand champion ang Barangay Magoong ug nakuha ang P70,000 nga cash prize nga gisundan sa Barangay Samburon ug Barangay Bosque na nakadaog ug P50,000 ug P30,000 cash prize.
"I am overwhelmed and very happy kay after 16 years karon pa nabalik ang Magoong nga nachampion," sumala ni Jhona Ricaplaza, usa sa performers.
Gibida sa Barangay Samburon ang importansya sa lubi sa paglambo sa gipahigayon nga Hudyaka sa Lubi Festival sa Linamon, Lanao del Norte.(ADD/PIA-10/Lanao del Norte)
Samtang gikoronahan isip Hudyaka sa Lubi Festival Queen si Mary Marjorie Cañete, ang festival queen sa Barangay Samburon ang ug nahakot ang Ms. Photogenic, Best in Production Number, Intro Spiel, Solo Presentation, ug Festival Costume awards.
“Para sa akoa, naa ko'y passion nga gusto jud ko muapil ani, and para sa akoa, kabalo ko nga kaya nako sya and ganahan ko ug challenges pud. I want to prove na kaya nako and I will overcome it,” sumala niya.
Giawhag sab ni Mayor Randy Macapil ang mga residente nga magpadayon sa panaghiusa.
“Isul-ob nato ang armor sa panaghiusa. Balik-balikon nako ni kay kung walay panaghiusa, walay kalambuan. Dili mulambo ang katawhan labi na sa ilang panginabuhi,”sumala niya.
Gilauman pa nga mapadayon ang kasadya sa pagsaulog sa Hudyaka sa Lubi festival aron ipakita ang progresibong coconut industry sa lungsod. (LELA/PIA-10/Lanao del Norte)
