CEBU CITY, Cebu, January 30 (PIA) -- Gianunsyo sa Department of Social Welfare and Development (DSWD7) nga adunay kinatibuk-ang 4,156 ka mga benepisyaryo sa Central Visayas ang migradwar sa Pantawid Pamilyang Pilipino Program (4Ps) niadtong 2023.
Ang gradwasyon nagpasabot nga ang mga benepisyaryo nakatabok gikan sa kakabos ngadto sa pagka-self-sufficient.
Si DSWD7 Regional Director Shalaine Marie Lucero mipahalipay sa pagpauswag sa kaayohan sa mga benepisyaryo pinaagi sa interbensyon sa programa.
Ang Social Welfare Development Indicator (SWDI) nga gihimo sa DSWD nagtino nga ang mga benepisyaryo nga mogradwar mao kadtong (1) adunay 0 ngadto sa 18 anyos nga mga bata, o (2) adunay mga bata nga migradwar sa senior high school, (3) kadtong kinsa nakakab-ot og maayong pagbag-o sa ilang kahimtang ug nakakab-ot sa pagka-self-sufficient.
Ang SWDI nag-una nga nagtino ug nagmonitor sa pag-uswag sa kaayohan sa mga panimalay sa 4P ug nagpahigayon sa pagdumala sa kaso alang sa usa ka malungtarong transisyon gikan sa kakabos.
Aron makonsiderar nga usa ka panimalay nga ‘self-sufficient,’ ang mga benepisyaryo kinahanglan adunay kita nga igo sa ilang adlaw-adlaw nga mga panginahanglanon ug nakab-ot ang labing menos sa duha lebel sa SWDI nga mao ang Survival (Level 1) ug Subsistence (Level 2).
“Giawhag nako ang mga naka-graduate na sa programa nga padayon nga magkugi ug dili kamlimtan ang mga nakat-unan nga mga leksyon pinaagi sa binuwan nga Family Development Session (FDS) kay magamit kini sa pagkab-ot sa ilang mga pangandoy,” matud pa ni Lucero.
Giila ni Lucero ang hiniusang paningkamot sa nagkalain-laing ahensya sa national government, local government units (LGUs), ug civil society organizations aron mapatuman ang kalidad nga kinabuhi sa mga benepisyaryo sa 4Ps.
Giila sa DSWD ang paglahutay sa mga sakop sa pamilya sa 4Ps nga nagtrabaho sa mga pribadong kompanya ug local government units (LGUs).
Naa usab uban nga nagtrabaho isip barangay officials ug barangay workers, overseas Filipino workers, magtutudlo, ug ang uban naa sa service sector. Ang uban nakigbahin sa mga kalihokan sa panginabuhian sama sa pagbuhi og kahayupan, pagpamaligya og pagkaon, pag-atiman sa balay, personal nga pag-atiman, mga tighatag og serbisyo, mga mag-uuma, ug mga mangingisda.
Ang DSWD nagpasalig sa mga benepisyaryo sa 4Ps nga migraduwar sa programa sa ilang padayon nga suporta uban sa tabang sa tagsa-tagsa ka LGUs ug uban pang partner stakeholders nga mohatag ug uban pang interbensyon ug serbisyo human makagawas sa programa aron ilang mapadayon ang ilang lebel sa kaayohan. (JAT/PIA 7)
