TAGBILARAN CITY, Bohol, January 31 (PIA) -- Nipagawas og pasidaan ang Commission on Higher Education (CHED) Rehiyon 7 kalabot sa gipang-post online gikan sa mga grupo ug/o mga indibidwal mahitungod sa mga aplikasyon sa UniFAST nga mga programa alang sa Academic Year 2024-2025.

Ang CHED namahayag nga mga fake news kini.

Matud pa sa komisyon nga ang CHED-UniFAST wala pa nagpagawas og panawagan alang sa pagsumite sa mga aplikasyon sa Tertiary Education Subsidy (TES) ug Tulong Dunong Program (TDP) alang sa A.Y 2024-2025.

Ang UniFAST usa  ka attached agency sa CHED ug ang primary implementer sa Free Higher Education (FHE) ug ang Tertiary Education Subsidy (TES) program ubos sa Republic Act 10931 o ang Universal Access to Quality Tertiary Education law.

Samtang ang TES usa ka grant-in aid program nga gipundohan sa nasudnong gobyerno nga nagsunod sa prioritization scheme sa pagpili niini sa mga kwalipikadong TES grantees gikan sa mga pampublikong unibersidad ug kolehiyo, ug pribadong HEI nga adunay kasamtangan nga memorandum of agreement uban sa CHED ug UniFAST aron ipatuman ang TES program.

Matud pa nga ang panawagan alang sa aplikasyon sa TES sa AY 2024-2025 ipahibalo sa dili madugay sa mga opisyal nga website ug verified social media accounts sa CHED ug UniFAST.

Alang sa dugang impormasyon, mahimong mokontak sa CHED-7 pinaagi sa email address nga chedro7@ched.gov.ph o unifastro7@ched.gov.ph, o motawag sa mga numero (032) 414-9194, 0949 166 2582, o 0905 032 9891. (ECB/PIA7-Bohol)