ILOILO CITY (PIA) -- Ginsaulog sang Department of Labor and Employment (DOLE) 6 ang dako nga papel sang mga “kasambahay” ukon mga timbang sa balay sa ginhiwat sini nga 2024 Kasambahay Day bilang pagkilala sa ila pagserbisyo kag mga sakripisyo.

Sila ginhatagan sang mga importante nga impormasyon tuhoy sa ila mga kinamatarong, benepisyo, lakip na ang mga oportunidad kag serbisyo nga ginhatag sang nagkalain-lain nga talatapan sang gobyerno.

“Kasambahays cook, wash plates and clothes, tend to the homes and children or elderly parents of their employer,” suno kay DOLE assistant regional director Melisa S. Navarra sa iya mensahe.

Sa bahin naman sang hepe sang Department of the Interior and Local Government-Local Government Monitoring and Evaluation Division (LGMED) Maricel M. Bechayda, siya nanawagan sa mga kasambahay nga magrehistro sa ila tagsa ka lokal nga pangulohan kon sa diin sila nahamtang ukon nagatrabaho.

Iya man ginpahibalo ang importansya sang ginatumod nga rehistrasyon sang mga kasambahay kaupod na ang ila proteksyon kag seguridad.

Ginganyat man ni Bechayda ang mga opisyales sa barangay nga mangin mas maukod pa sa pagtuman sang ila mga responsibilidad ilabi na sa pagparehistro sang mga kasambahay.

Ang focal person sang Batas Kasambahay sa rehiyon nga si Andrea Pama-Ligad ginpahibalo man ang mga kaundan sang RA 10361 ukon ang Batas Kasambahay, kaupod na ang mga pagsulundan sa pagsalbar kag rehabilitasyon sang mga gin-abuso nga kasambahay nga nakasaad sa Joint Memorandum Circular (JMC) No. 2015-002 sang DOLE, Department of Social Welfare and Development (DSWD), DILG, Philippine National Police (PNP), kag sang National Bureau of Investigation (NBI).

Para naman sa paghatag importansya sa ikaayong lawas, si Romela Dee Candoliza nga nutritionist sang National Nutrition Council ginpakigbahin naman ang nutrition program nga “10 Kumainments kag Pinggang Pinoy.”

May ara man nga Help Desk kon sa diin ang mga tiglawas sang Social Security System (SSS), Technical Education and Skills Development Authority (TESDA), Philippine Health Insurance Corporation (PhilHealth), kag Home Development Mutual Fund (HDMF-Pag-IBIG) ang nagsabat sa mga pamangkutanon sang mga kasambahay.  

Nagbaton man ang Pag-IBIG kag Philhealth sang onsite registration sang mga wala pa ka parehistro nga mga kasambahay.

Nakabaton man ang mga nagpartisipar nga kasambahay sang free massage, tote bags, freebies, kag iban pa nga mga gamit halin sa mga ahensya.

Ang ini ga inisyatibo, kaupod ang nagkalain-lain nga institusyon, ginpatigayon kaangot sa layon sang DOLE nga maghatag serbisyo sa mga pinakanagakinahanglan kag mabudlay malab-ot nga mga sektor sang sosyodad. (AAL/AGP/PIA 6)