TAGBILARAN CITY, Bohol, January 31 (PIA)--Ang Department of Social Welfare and Development (DSWD) Field Office 7-Central Visayas mitaho nga 299,737 ka mga kabus nga senior citizens ang nakadawat og P500 matag buwan nga stipend niadtong 2023 pinaagi sa social pension program sa ahensya.

May kinatibuk-ang P1.8 bilyones ang gipagawas aron mabayran ang 100% sa target nga gidaghanon sa mga senior citizen sa rehiyon.

Ang DSWD7 nag-apod-apod sa kantidad ngadto sa mga benepisyaryo pinaagi sa direktang pagbayad ug ang pagbalhin sa pondo ngadto sa 80 ka local government units, kinsa maoy nag-facilitate sa pagbayad sa ilang mga konstituwente.

Sa 299,737 ka mga kabus nga senior citizens, 127,439 ang gikan sa Cebu, 99,490 gikan sa Bohol, 62,287 gikan sa Negros Oriental, ug 10,521 gikan sa probinsya sa Siquijor.

Ang DSWD nipagawas og report niadtong Enero 24, 2024, nga nag-ingon nga kapin sa 4 ka milyon ka mga kabus nga senior citizens sa nasud ang nakadawat og kinatibuk-ang P6,000 niadtong 2023, diin 7% niini gikan sa rehiyon sa Central Visayas.

Ang samang report naghisgot nga ang 2024 monthly stipend mosaka gikan sa P500 ngadto na sa P1,000 sugod sa Pebrero.

Ang Republic Act 11916, o Act Increasing the Social Pension of Indigent Senior Citizens, naghatag og 100 porsiyento nga usbaw sa binuwan nga stipend aron matabangan ang mga benepisyaryo sa padayong pagsaka sa presyo sa nagkadaiyang panaliton.

Ang social pension program naglangkob sa mga kabus nga tigulang nga huyang, masakiton, o adunay kakulangan, o kadtong walay permanenteng tinubdan sa kita o regular nga suporta gikan sa ilang pamilya ug kinahanglang walay pensiyon gikan sa gobyerno o pribadong ahensya.

Gihatag kini sa mga kwalipikado nga mga benepisyaryo sa usa ka semestre nga basehan aron madugangan ang ilang inadlaw nga panginabuhi ug uban pang mga medikal nga panginahanglanon. (ECB /PIA7-Bohol)